هلال وظلال
عبد المنعم هلال
الهلال بدون رئيس للقطاع الرياضي والمريخ رجع للشكاوى
ـ الهلال لعب مباراته التانية في دوري النخبة وهو بدون رئيس للقطاع الرياضي بعد غياب العليقي نائب الرئيس ورئيس القطاع طيب سؤال بريء فريق بحجم الهلال يكون ما عندو رئيس للقطاع ..؟! هل ده وضع طبيعي .؟!
ـ غياب العليقي بقى مثار تساؤلات.. هل الزول نأى بنفسو تماماً ..؟ ولا بقى يشرف بس من برة السودان ..؟! لحدي هسي ما في توضيح رسمي والجماهير محتارة.
ـ في ظل الغياب دا عبد المهيمن شايل الشيلة كلها وبقي مسؤول من كل حاجة في الفريق من الصغيرة للكبيرة. ربنا يعينو ويقويه لكن الشغلانة دي ما ساهلة.
ـ الهلال له لقاء مهم جداً اليوم ضد أهلي مدني أفضل فرق النخبة والمباراة دي دايرة تركيز واستعداد خاص ولازم الهلال يطلع منها بالنقاط التلاتة لو داير يحافظ على الصدارة.
ـ ملف التدريب في الهلال لم يحسم بعد وقد جاء في الاخبار أن فيتا كلوب الكونغولي قام بقطع الطريق على الهلال وتعاقد مع المدرب التونسي صابر بن جبرية الذي كان الهلال ينوي التعاقد معه.
ـ وبدينا نرجع لي حكاية الشكاوي والسمكرة ..! المريخ اشتكى في عدد من لاعبي مريخ الأبيض قالوا إنهم في نفس الوقت مسجلين في نادي أركويت والنادي دا تابع للمريخي عوض رمرم ..! يعني الحكاية كلها ماشة في درب (ورني الزول وانا أشتكيهو).
ـ المريخ لما لعب في الدوري الموريتاني لا لقى تحكيم ينحاز ليهو ولا لجان تنقذو ولا قرارات من تحت التربيزة عشان كدا احتل المركز السادس .! وفي السودان ممكن يبقى بطل بالحكام واللجان.
ـ اتحاد (القرارات الفجائية) والفرمنات العشوائية قرر إنو نهائي كأس السودان بين الهلال والمريخ يتلعب في بورتسودان ..! يعني فجأة كدا بدون أي منطق ولا ترتيب مسبق ..!
ـ دوري النخبة شكله حيكتمل بـ(أخنق فطس) ونهائي الكأس حيتم واتحاد الفساد حيواصل في نفس الخرمجة القديمة كأنو ما في زول شايف ولا سامع.
ـ الهلال محتاج لترتيب البيت من الداخل ما ممكن فريق كبير يكون ما عندو رئيس قطاع رياضي ..! والسكوت على غياب العليقي بدون توضيح بفتح الباب للتكهنات والجماهير تستحق أن تعرف الحقيقة.
ـ المريخ فبدل ما يركز على الملعب ويحاول ينافس بشرف رجع لي هوايتو القديمة الشكاوي واللوائح و(سمكرة القوانين)! لكن في الملاعب الخارجية ومع الأندية الموريتانية لما اختفى التحكيم المنحاز واللجان المدعومة ظهر المريخ على حقيقته ومسك الطيشية بجدارة.
ـ الاتحاد العام محتاج وقفة.. كفاية خرمجة وكفاية قرارات فجائية بدون دراسة وكفاية عشوائية وكفاية فساد والرياضة ما بتمشي بـ(الخرمجة) والعنتريات ولا ببرمجة مباريات على كيف اللجنة الفلانية ..!
ـ لو دايرين كورة نظيفة وتطور حقيقي لازم نبدأ من فوق من الاتحاد العام نفسو ونمشي لغاية إدارات الكرة بالولايات وإدارات الأندية.. وقتها بس ممكن نحلم بكرة مختلفة.
ـ لا أمل في تطور الرياضه في البلاد طالما الاتحاد العام على رأسه هؤلاء الديناصورات.
Share this content:
