قزاز ورذاذ
محمد الطيب الأمين
جان كلود الما بخجل يطالب بقروشو ..
مرات الأحزان بتعمل إنسداد لمناطق الفرح عندك.
البلف حق السعادة بحصل ليهو إنسداد بسبب (جُرح مدني).
أو (جرح الخرطوم) .
وبلف البهجة (بتسدو) صرخة طفلة نازحة وجائعة في ليل الشتاء.
بحصل ليك تراكم أحزان سببو أم درمان ونيالا والنازحين والأرواح الراحت.
فبتلقى جسمك منتفخ بالأحزان لأنو الوجع جواك ما حصل ليهو (تنفيس).
إحتقان.
(حبس حزن) وهو أسوأ من (حبس البول).
فلابد من التنفيس.
لابد من عملية (نظافة أحزان) تعقبها عملية (زراعة فرح) بعد أن تتطابق الأنسجة.
لأنو الحصل لينا (فشل فرحي) يضاهي (الفشل الكلوي).
وبما أن ذلك كذلك فأن ما يفعله الهلال الآن هو (تنفيس).
حاجة تشبه (عملية نقل الفرح).
يقدم الهلال للناس ما يشبه (المضاد الحيوي) الذي يُصارع (فايروس الأحزان) في الدم.
(مضاد الهلال الحيوي) يجعل الآن شعب الهلال أكثر عافية وأكثر فرحاً من غيرهم.
(بلعنا) من المضاد وبلغنا العشرة نقاط.
في صدارة المجموعة بفارق كبير.
وتأهلنا قبل جولتين.
أول فريق في الأبطال يتأهل لربع النهائي.
نحن في أفريقيا الآن بنشبه (المطر عز الحريق).
نيران جوانا يطفيها الهلال.
يتقدم بثبات نحو تحقيق الغايات.
يتألق داخل أرضه الإفتراضية (موريتانيا) وخارج أرضه.
نجوم واعدة تصنع (شربات الهلال) الآن.
جان كلود براهو (شربات).
قلتها من قبل (جان كلود من نوعية اللاعبين الذين يمتعون بقوة عين).
قوة عين شديدة.
ما بخجل من البسوي فيهو.
والله صحي.
بشتنة شديدة.
ما بخجل.
قوة عين.
بجيك في محلك.
حقار جداً.
تحس إنو البعمل فيهو جان كلود شغل بتاع (رجاله رجاله).
بدقشك عديل.
زي الداير منك قروش.
وهذا الشجاعة المقرونة بالشطارة تتوفر أيضاً عند كوليبالي وكذا إيمي.
إيمي ماشاء الله متى ما شارك بعمل تحول كبير في الهلال (شكلاً ومضمونا).
إيمي إمكانيات كبيرة وقدرات عقلية تجعل منه فرس رهان.
مواهب أفريقية تشبه العطور تضفي الآن لمسة جمالية على الهلال.
شكراً لهذا العطا والجمال.
جمال الشوط الثاني.
ما بنخلي الشوط الأولى يفسد لينا فرحة التأهل.
تشكيلة الشوط التى لم توفق هي نفس تشكيلة مباريات كتيييرة كسبها الهلال عرض ونتيجة.
ياهو روفا ، ويا هو صلاح عادل وياهو بوغبا.
هم ذاتهم الكانوا بحققوا الإنتصارات.
أمبارح ما كانوا في يومهم.
وديوف برضو.
بالإضافة للضغط العالي اللعب بيهو المولودية.
إتخيل الهلال لو كان لعب زي المولودية في الشوط الأول وسجل هدف ، وجا في الشوط التاني (رقد)، زي ما ناس المولودية رقدوا.
إتخيل بس؟؟
كان الجماعة الطيبين طالبوا بإقالة الجهاز الفني بعد ساعة من المباراة.
المولودية لعب في الشوط الأول والهلال لعب في شوط المدربين.
مدرب المولودية مالو ما لعب في شوط المدربين؟؟
تاااااني كدا إتخيل .. الهلال يقدم أفضل عرض في الشوط الأول ويكسب المولودية بهدف ، وفي الشوط الثاني المولودية ينتفض ويتألق ويتعادل .
اها في الحالة دي رأيك بكون شنو؟
الدم بيصل الركب صاح؟
الحمدلله إنو الهلال الآن مشرفنا ورافع رأسنا.
يغلط ويخسر ويتعادل (زيو وزي أي فريق في الدنيا).
وممكن يطير وبرضو مشرفنا.
نعيش في سعادة كبيرة سببها الهلال.
شكراً مجلس إدارة نادي الهلال.
شكراً فلوران.
شكراً (خالد بخيت).
شكراً عبد المهيمن.
شكراً الجهاز الطبي وطاقم التدريب.
شكراً نجوم الهلال بقيادة الغربال
مبرووووك جمهور الهلال العظيم في كل مكان.
أخصلوا للحظة الفرح عشان لو لا قدر الله جات لحظة حزن برضو نخلص ليها.
ويا حليلنا نحن المخلصين.
ما تفسد فرحتك بي (لو كان ولو كنا ولو ما كان ولو عمل).
ده الموجود.
و(لو) تفتح عمل الشيطان.
ونركب صافنات ونجيبة (هلالابية) وأصلو الزول بموت والذكرى تفضل حية.
و… و….
والحنين الجيتني بيهو جاني في لحظات …… (حمى ومعاها برد).
شارك الخبر على:
