قزاز ورذاذ
محمد الطيب الامين
عفاف حسن أمين وجمعة (العقد)..

(الجمعة) عندنا في السودان إرتبطت بالشعيرية والبطيخ و(العقد).
جاتنا فترة نحن وأولاد حلتنا بنصلي الجمعة في (الصف الأول) عشان نصادف (خبيز العقد).
(خبيز العقد) ما بصل الصفوف الورا.
عشان كدا كنا بنصلي خلف الإمام مباشرة.
عندنا صاحبنا حيوان جداً ، مرة قال لينا صلاتكم دي (صلاة خبيز ساكت).
ما إشتغلنا بكلامو لأنو رغبتنا في الخبيز كانت أكبر من السخرية بتاعتو دي.
النسوان بعملن خبيز العقد أجمل من خبيز العيد ذاتو.
حاجة كدا في منتهى الحب.
(الجمعة) في السودان طعم مختلف ويوم عالي الخصوصية.
تضرب العصيدة والشعيرية في الفطور والبامية المفروكة والبطيخ في الغداء.
اللهم أرحم والدي العزيز وأدخله الجنة يارب العالمين.
بالمناسبة .. زمان نحن ما بنأكل الشعيرية يوم الأربعاء ولا بنأكلها يوم السبت.
نهاااائي.
رسخ عندنا إنو الشعيرية لا تجوز إلا يوم الجمعة.
زي الباسطة.
حصل شفت ليك زول عاقل أكل ليهو باسطة نص النهار ؟
تقريباً صادفتني (بت) زمان كانت بتأكل باسطة نص النهار.
ما عارفها كانت حاسة بشنو ؟
حيرتني ذاتو.
الجمعة عندنا إرتبطت بتفاصيل بتوجع القلب والله.
مرة عملت حوار مع صديقتنا الجميلة عفاف حسن أمين.
عفاف في الحوار قالت لي : أنا يا محمد كل يوم جمعة ببقى عيانة.
من يوم الثلاثاء عفاف بتكون عارفة نفسها يوم الجمعة ح تكون عيانة.
يعني عادي ممكن تتصل لعفاف يوم الأحد تقول ليها نتقابل الجمعة بتقول ليك : سوري الجمعة أنا عندي مواعيد مع المرض.
أول ما تطلع من قناة النيل الأزرق برنامج (صباح الجمعة) طوالي عفاف بترقد عيانة.
وبتتعالج بالصلاة على الرسول صلى الله عليه وسلم.
أنا والله في شوق لا يعلم به إلا الله للجمعة في السودان .
الجمعة حقتنا الزمان.
دنيا .
#محمد_الطيب_الأمين