وهل الأوكسجين بالواسطة يا دكتورة !؟

قزاز ورذاذ
محمد الطيب الامين
وهل الأوكسجين بالواسطة يا دكتورة !؟

في إحدى مستشفيات أم درمان وفي هذه الأيام القاسيات ، قالت الطبيبة لأهل المريض : شيلوا زولكم دا من هنا نحن في الطواريء ما بندي أي زول أوكسجين.
ليه ؟
قالت ليهم : دا قرار إداري.
طيب الزول دا ح يموت وقاعد (يفرفر بفتش للنفس اديهو أوكسجين).
لا.
ممنوع .. بقرار إداري.
يعني هو في أوكسجين لكن إدارة المستشفى قالت ما يدوهو لزول في الطواريء !!؟
طيب الأوكسجين المفروض يدوهو لزول قاعد وين ؟
يعني المريض دا المفروض من الطواريء يمشي وين عشان تدوهو الأوكسجين ؟
ضل الشجرة في أول الشارع ؟
ولا يمشي القبر ؟
القرار الإداري دا (مُنزل) ؟
هل في نص من القرآن الكريم قال ما تدوا زول عايز يموت أوكسجين في الطواريء ؟
أي محنة تحصل في السودان بتكشف سوء أخلاقنا بصورة ربما لا يتوقعها أحد.
ما يحدث الأن في أم درمان من بعض تجار الأزمات والله مؤسف.
مضاعفة أسعار الدربات.
عربة الإسعاف محتاجة لرأس مال.
جشع وإستغلال وعدم رحمة.
بعض جوكية الركشات ممكن يستغلك حسب (تعبك).
لو خلاص عايز تموت بضاعف ليك سعر المشوار خمسة مرات عشان ما عندك خيار.
أتنين بس .. يا تركب وتدفع ويا ملك الموت قريب منك.
حكايات لا تصدق والله.
نسأل الله السلامة والشفاء وصلاح النفوس.
النفوس التي لم تتعلم من الحرب.
النفوس التي ترتاح على حساب أوجاع الناس.
الله في.
#محمد_الطيب_الأمين