وجيت أقول مبرووك عليك (4)

قزاز ورذاذ
محمد الطيب الامين
وجيت أقول مبرووك عليك (4) ..

أواصل في الحلقة الرابعة من قصة صديقي في ليلة زفاف حبيبته .
طلعنا على خزان جبل أولياء والدنيا ما زالت صباح.
ونحن في الشارع الرئيسي وقفنا نشرب قهوة حسب رغبته هو.
شربنا .. ونحن طالعين من ست الشاي مرت أمامنا ركشة فيها (البت صديقة العروس الجابت لينا الخبيز ديك).
مرت قدامنا بالركشة وهي تحمل (فستان الزفاف).
قالت لي : لو عارفاكم جايين هنا كان جيت معاكم دايرة أرجع الفستان الكوفير.
قلت ليها : كويس طيب.
المهم.
وصلنا خزان جبل أولياء ، والساعة حوالي عشرة ونص تقريباً.
ما في زحمة لكن الناس بدت تجي.
ودائماً يا جماعة أنا عندي قناعة إنو الحاجة الأنت بتخاف منها بتحصل ليك.
مثلاً .. لو أنت مستعجل وعندك مواعيد مهمة ، لازم تلقى زحمة أو يأخرك زول أو (يبنشر ليك لستك) أو أي حاجة تأخرك.
وكذلك لما تكون (مجروح في الحنايا) بتلاقي حاجات بتهيج ليك الجروح.
لما نزلنا الخزان لقينا حوالي ستة شباب ومعاهم تلاتة بنات قاعدين في كراسي وقدامهم تربيزة قهوة وفاتحين (أبواب الهايس) والمسجل شغال بأعلى صوت.
كانوا مشغلين أغنية بتاعت (زنق) ، أغنية (هابطة ساكت).
قلت الحمدلله على نعمة الغناء الهابط.
أول مرة أحس الغناء الهابط فيهو فايدة.
ولكن وللضمان ومن باب الإحتياطي قلت ليهو ما نقعد هنا.
أرح هناك.
لأنو أنا عارف أغنية (الزنق الهابطة الشغالة دي ح تنتهي) وبعدها إحتمال تجي ناطة لينا أغنية : (الدنيا ياما تعلمك .. العشرة في يوم ما بتهون .. القسوة في ظلم الأحبة يا قاسي بتجرح جفون .. يا الإصطفيت غيرنا ومشيت .. رغم البعاد ليك ما بخون).
حيدر بورتسودان قال : (القسوة في ظلم الأحبة يا قاسي بتجرح جفون) .. هي لو بقت على الجفون هينة والله.
كمان مصطفى سيد أحمد في (غدار دموعك) قال : وجفونا من طول السهر تلبس وشاح فرقة وألم.
زحينا بعيييد من بتاعين الهايس وطلبنا السمك.
ربع ساعة جابوا لينا طلبنا.
قبل ما نقول بسم الله صاحبي سألني سؤال زي ضربة السيف.
سؤال بوظ أعصابي التعبانة اصلاً.
سؤال خلاني مرتبك وأشتر وفقير أتسول المفردات.
قال لي : تتوقع الجماعة ديل ح يسافروا يمشوا شهر عسل وين !!؟؟؟
السؤال دا بالذات أنا ما حسبت ليهو حساب ولا خطر في بالي.
والله أول مرة يجيني إحساس إحباط ما طبيعي ومن لحظتها عرفت إنو صاحبي دا بدأ يدخل في مرحلة صعبة صعبة.
قلت ليهو : ما ح يمشوا شهر العسل.
قال لي : كيف يعني؟
قلت ليهو : عادي.
قال لي : هو شنو العادي.
قلت ليهو : أنا سمعت إنو العريس أخد إجازة إسبوع واحد فقط.
والأسبوع دا لحدي الآن عدت منو تلاتة أيام.
قال لي : أنت يا محمد بتهظر ولا شنو ؟
لما شفت وشو إتغير وبقى ما قادر يقعد في الكرسي وكمان بدأ يتنهر ، قلت ما في حل أنا لازم أتواجه معاهو وأخلي أسلوب الطبطبة دا.
لأنو لو سكت ليهو ح يفتح موضوع بتاع خيال جديد.
وخيال الزول المجروح لا حدود له.
قلت ليهو شوف يا الحبيب الزولة دي نحن ما عندنا حاجة غير نتمنى الله يسعدها ويوفقها ويسترها في حياتها الجديدة.
وبعد دا تاني ما عندنا بيها شغلة.
تمشي شهر العسل ولا شهر العسل يجيها دي حاجة ما بتخصنا.
زولة عروس أنت دايرها تمشي سوق أم درمان ولا شنو؟
أكيد ح تمشي شهر عسل وأنت عارف كدا كويس.
يا تبقى راجل وتقتنع بالقسمة والنصيب ويا كمان تقعد تسرح وتقول شهر العسل وين؟ ومالها اتأخرت؟ وليه سافرت ؟ وليه جات؟
قال لي : لكن هي ما عندها جواز سفر.
قلت ليهو أفرض عندها جواز سفر اهاا ح نعمل شنو يعني؟
الكلام دا كلو والسمك قدامنا والله.
قلت ليهو : يا زول الكلام دا عيب منك ، الزولة دي خلاص بقت (مرت راجل) وما عندنا شغلة بتفاصيلها ، خلي الأفكار دي وأرح قول بسم الله أكل.
أنا والله كنت بقول ليهو في الكلام دا وببكي .
بكيت لما شفت دموعو نازلة.
وأول مرة أشوف صاحبي ببكي بصوت.
الأيام الفاتت كلها هو كان ببكي كتير لكن ما كان ببكي بصوت.
المرة دي بكى بصوت وحصلت ليهو حاجة أقرب للتشنج.
ودا كان من أصعب الأيام الأنا شفتها في حياتي.
وحسيت بإحباط كبير شديد ، أصابني إحباط لاني كنت فاكر إنو الموضوع إنتهى بإنتهاء مراسم العرس.
كنت فاكر إنو بمجرد إنتهاء الزفاف بالأمس سنكون عبرنا إلى الأمام.
ولكن وللأسف الشديد المعاناة بدأت عند صديقي مع بداية شهر عسل حبيبته.
ست الشاي لما شافتو ببكي بصوت ومدنقر جات شايلة (جك موية) وأول كلمة قالتها : البركة فيكم يا ولدي الموت جائز.
مسكينة ما عارفة هو ببكي (ريد مات جواهو) وأنا ببكي حال صديقي الذي هو لا يستحق إلا الخير والخير الكتير كمان.
ح أقيف هنا وأواصل في الحلقة الخامسة بكرة إن شاء الله وهي حلقة الهواجس والظنون.
و……..
وجيت أهنيك وأصافحك وجيت أقول مبرووك عليك 💔💔
#محمد_الطيب_الأمين