*شلعوها المارقوتاب*

وشوشة الرياح
*شلعوها المارقوتاب*
انور ابنعوف
رغم ختام الموسم المسلفق
ما زالت الاحداث الرياضية تتدفق علي مستوي كرة القدم جماهير الهلال متلهفة لرؤية الصورة الكاملة لعشقها، الهلال قام بالعديد من الاضافات الاجنبية ومازالت الوعود والترقبات لما هو ات في الاطار كرشوم ومدافع اجنبي يعني دفاع كامل بدكتو الحارس الفريد فريد مازال في انتظار التأكيد بالامس ودعنا كديابا ومنتظرين الدبابة عشان نقفل
بالطار والربابة طاقم حراسة المرمي ود المصطفي العليقي لو ختاهو في راسو بجيبو بجيبو دا جاب لوزولو من مازيمبي ، الوسط تقفلة صابر بوتيك المدرب لسة ما بانت اخبارو لكن اكبر عقبة حا تواجه المدرب التشكيل
ياخي لو جبت مدرب ليفربول راسو بضرب كدي كشف بس طبعا الاسامي الجابا العليقي توهم دارس الطب زاتو هاك امسك ابروسيوس دا اسم ماتلقاهو الا في قيامة ارطغرول اي اسمو كدا وانا عشان افرزو سميتو اب رويس دا بتاع شغل برا ما مخصص لناس شلعوها بمناسبة شلعوها
قالو رئيسن الجديد بتفاوض مع جان كلود جان كلود
قال كدي جيبو السماني الكبرا من عطبرة نسيت حسبنا كم في الوسط جان كلود ماتحسبو دا بلعب باك
اقصد بلعب في اي حته في الطرف الشمال ماعندو قشه مرة ومرات عادي بكسر بزور ناس صلاح عادل وروفا وبوغبا وفوفنا الموريتاني وايمي تدينق عليك الله اسم ايمي تدينق دا براهو ما زي البتلعب ليك في بنق نرجع لزولنا كلود احسن الوسط دا ولابتحسب زاتو خلي تخت ليهو تشكيلة ومرات كتيرة بجي مكان الطيارة بتقوم
محل الغربال وبلبع لبعتو تمانيات لكن من كراعو للقون المسافة دي داخل عجلة الزمن ولابتشوفا لو عادوها ليك بمسلسل الرجل الخارق كلود دا جن امن ياجن تاو تاو النجيري دا كلامو براهو مكنة اهداف وسرعة فاحشة عديل يعني هو و ياسر مزمل حايلعبو سباق مية متر غايتو يا ناس شطة ونيالا الله ما يلمكم معاهم في مباراة الا تشقوا ليهم مشاققا والغربال جايهو احتاطي اجنبي سوبر احمد سالم قاعد هناك ويكاشم يعني لو كيلو…بالي مقصودة فات سالم علي الرواق قائم
غايتو الهلال السنة لو ما لعب كاس العالم للابطال
الا استهبال العليقي قنع ليك من بترول ومن جازولين بس خاتي راسو مع التسجيلات دي اي خانة فيها تلاتة واي واحد في التلاتة شوكلاتة
الكاردينال اقصد العليقي بجيك راجع ياهندسة لكن وكت كردنة جا ناطي نديهو كلمتين انت ياريس لما ناس شلعوها جوك كايسين السترة بعد ما اعتذرت ليهم كان تسترن ماكان في داعي للاحراج دا ياكردنة قلت لي قلت ليهم لكن انا هلالابي ياخي دي تقفيلة صااابر زاتا
المهم نرجع لموضوعنا اسي عليك الله عبد الرؤوف دا نسميهو شنو ونقول عليه. شنو دا كان قلنا صاقعة شوية مسيرة استراتيجية شوية برضو ياخي دا اطلال ساهي ما خلاها صاروخ في الدامر دمر اي حاجة عبد الرؤوف ياخي انت زول رايق ولعبك زاتو رواقة العنف دا جبتو من وين ياولدي بي صاروخ واحد هديت العملو الوالي في عشرة سنة بمناسبة سنة زمان في التمنينات كانت المغازلة ب ( سنة) واسي نحن نغازل ولدنا روفا ونقول ليهو (سنة يا انا) اها نرجع لموضوعنا روفا دا لو اتغزلنا فيهو بغزل البنات ما بديهو حقو حاجة كدا تقطع نفس خيل القصايد قلت لي ياروفا بصاروخ واااحد
كسرت اضان سيكافا وهزيت عرش باير ميونخ زاتو ، روفا ياجنانا روق المنقة وخت الكورة واطا مافي داعي للتمانيات كفاية اربعات اربعات دي زمان ادونا ليها قصيدة في الابتدائي (يا اربعات رجعت لي انشودة الحب العميق
هذه السراء بانت بعد ضيق)
ياروفا انت ماخليت السيارة تطوي بنا ذاك المضيق انت بفتلتهم بروز رايس ولا لمبرغيني غايتو صاروخ مدنكل هزا عرش بلقيس
وتهاني وسوسن اسي انا جبت سيرة شلعوها
جان كلود انت انس ولاجان
قالو كلمة كلود لاتنية الاصل تعني الاعرج او المقيد اها عليك الله دا براهو ماتزوير في دفاتر رسمية ان شاء الله عرجة حبيك امانه ماعدم قيد غياتو الهلال السنة دي نازل في افريقيا زي صواريخ ايران في تل ابيب
التحية لاربعات
وخور بركة
وليكم انتوا. تحياتي
تحياتي