دي ما قروش يا دكتورة دي قلوب حايمة حولك..

قزاز ورذاذ
محمد الطيب الامين
دي ما قروش يا دكتورة دي قلوب حايمة حولك..

لما تلقى سوداني أو سودانية في الشارع ح تلاحظ (الطيبة والحِنية) في طرف (الجلابية) وفي ريحة (التوب) وفي خطواتو.
نحن في المشي (حنينين جداً).
بنمشي براحة عشان ما نزعج (النمل).
نحلف صادقين إنو الإنسانية عندنا أعلى.
نحن (كتلة) بتاعت مشاعر من (لحم ودم).
السوداني زي (شيك المصارف).
و(شيك البنك) في أي لحظة بِتصرف.
نحن في (بنك الإنسانية) شيك.
والله صحي.
شيك غير راجع.
تهبشنا في الجوانب الإنسانية طوالي بنصرف ليك أجمل ما عندي.
ولذلك يحق لنا أن نتباهى بين الأمم بأننا أصحاب قلوب مُحبة للخير.
نحن قلب الدنيا ديا ونحن عز الدنيا بينا .
الدكتورة (رانيا) ، فجرت الميديا وفجرت قلوب الناس وحصدت (800) ألف قلب .
الناس فاكرة ال(800) ألف دي قروش.
لا ابداً .. دي ما قروش والله.
دي قلوب.
والقلوب الحايمة حولك دائماً بتتمنى ليك الخير.
دكتورة (رانيا) السودانية التي تعمل بالمشافي السعودية ، أوقعت عليها السلطات هناك حكم بالغرامة (800) ألف ريال ، حوالي (200) ألف دولار وذلك بسبب خطأ طبي.
والدنيا قامت.
والسودانيون ما يدوك الدرب.
في (24) ساعة جمعوا هذا المبلغ وبالزيادة كمان.
تدافع وتسابق غير مسبوق.
كل زول قطع من جِلدو وساهم بالفيها النصيب.
أنت قايل محمد علي أبو قطاطي في أغنية (الفينا مشهودة) لما قال : (البقع بيناتنا بنسدو).
لما قال كدا أنت قايلو كضاب يعني؟
كان صادق جداً.
وهسه (رانيا) وقعت بيناتنا وسندناها سند لا يعلم به إلا الله.
عشان كدا نحن بنقول (نحن نحن).
ونحن إن قلنا نحن الكل يردد نحن
نحن بنشكر الله واهب منح مانحنا
نحن كما الجبال العاصفة ما بطوحنا
ونحن نزيد ثبات كل ما نواجه محنة.
شكراً لأهلي السودانيين على هذا الدرس.
شكراً لكل الجاليات العربية ، شكراً الشعب السعودي الأصيل شكراً لكل الناس العملت شير وساهمت بشكل أو اخر .
نحن بالإنسانية أقوى.
وبالحب أجمل 🌹♥️.
و….
والزول بفتخر وبباهي بالعندو.
#محمد_الطيب_الأمين