المبدع زينو يفتح قلبه للفار
لو بقبض بالدولار ما كان اغتربت !!
انا ما عدو المرأه لكن عندي مشكلة مع البنات المتصنعات السماحة
هناك كثير من المواهب تركت ممارسة الكرة بسبب العقليات الادارية
عندي صحبي في اداري قال ليهو سجلناك عشان شعرك ؟
ببحث عن الزوجة الصالحة ودا بمثابة اعلان عبركم !!
حاوره: رئيس التحرير
محمد زينو اسم كبير في عالم الميديا صاحب نكتة وحضور طاغي له قاعدة كبيرة في الميديا لما يقدم من محتوى الفار اجرت حوار مختلف مع زينو في المساحة التالية
محمد زينو رمضان كريم
الله أكرم وتصوم وتفطر على خير والسنه الجايه تامين ولامين في السودان الحبيب
كيف رمضان معاكم ؟
ولله رمضان جميل يااخ بس فاقدين لمة الاهل والجيران وشكلة الشفع بتاعين سلوك اللماع بعد صلاه التراويح مع اعمامك الكبار
انتو المغتربين ديل ما بتحسوا برمضان ؟
زي ما قلت ليك رمضان لما يكون بعيد عن لمة الاهل والأصحاب بفقد طعمو
يااخ نحنا في الفطور مع العزابه بنعمل صحن واحد بس تقول بادين رمضان من ورا، نهاية رمضان بكون الاكل تعبان وصحن صحنين بالكتير يلا نحنا من بدايه الشهر كدا
سبب هجرتك شنو من السودان ؟
الجيب بقى فاضي يااخ دا اول سبب
بعدين السنوات الاخيره في السودان الوضع تدهور شديد معظم الشباب هاجرو نسأل الله أن يصلح حال البلد
قالوا قصة حب خلتك تسافر ؟
عليك الله دا وضع يحبو فيهو
زينو ليك كم سنة من السودان ؟
دا السؤال البخلي الناس تسالك ليه طيب ما عرست عشان كدا ما بجاوب على السؤال دا
حدثنا قليلا عن زينو ؟
انا محمد زين العابدين مواطن سوداني يبحث عن الزوجه الصالحه ودا بمثابة اعلان عن طريق صحفية (الفار) والعقد بلح بس
متى بدءت قصة اليوتيوب ؟
اليويتوب لسه ما بديت رسمي كدا فيهو لكن ان شاء الله شهر ٤ او شهر ٥ ح نبدأ بداية رسمية
قالوا بتقبض دولار تقيل من اليوتيوب دا ؟
اذا بقبض دولار تقيل ما كان اغتربت ههههه
يقال انك عدو المرأه وتحديدا البنات السمحات ؟
لا والله اشاعات ساي
عندي مشكله لكن مع البنات المتصنعات السماحه
مشكلتك شنو مع لوشي هاجمتها ؟
انا ما عندي مشكله مع أي زول جبتو في يوم من الايام في فيديو بالعكس لما ننتقد زول بنكون عايزين الزول يتصلح للأحسن
يبدو ايضا عندك رأي في الاداريين في السودان البيديروا كرة القدم ؟
عندي فيديو عملتو 2019 عن الادارين والمدربين الفي السودان كان حصل على رواج كبير في الميديا بعدها جاتني قصص كتيره لعدد كبير من المواهب تركت ممارسة كره القدم بسبب العقليات الإدارية الموجوده في بلدنا
ياخ انا عندي صحبي سجلو احد الأندية الإداري بتاعو قال ليهو سجلناك عشان شعرك دا طوالي خلى الكوره وهسي موظف في احد شركات البترول وأمورو طيبه.
زينو شكرا ليك ياخ ؟
شكرا ليكم انتو وتحية لك الأخ عمر والتحية لكل قراء الفار.
Share this content:
