نوارة الهلال تفتح قلبها للڤار

نوارة الهلال تفتح قلبها للڤار

شادية عطا المنان: بحلم بسودان خالي من العنصرية

في رمضان الحالي اللمة بقت صعبة والتواصل اسفيري

في عمق قلبي يجلس الهلال وفي مسام الروح يكون الحضور بالازرق

انا صاحبة رسالة لا تعنيني الإمكنة فأين ما اجد الشباك اصيب الهدف

حاورها رئيس التحرير

هلالابية تضارب.. مجنونة بالازرق صاحبت حضور طاغي وطلعة انيقة .. شاعرة ومذيعة وصحفية وأدارية لها بصمات واضحة دون الاكثار في المقدمة اقدم ضيفتي اليوم الانيقة شادية عطا المنان .

شادية رمضان كريم ؟
مبارك عليكم. الشهر الكريم وكل عام والسودلن طيب والقوات المسلحة الباسلة بالف خير

وين بلدك مع جوطة البلد الحاصلة دي ؟

في بورتسودان الساحرة

كيف بتقضي رمضان ؟
السنة دي انا بعيدة عن اسرتي وهو رمضان حزين بالنسبة لي
بعيدة اسرتي

رمضان هسي و زمان ؟

هسي مختلف اللمة بقت صعبة والتواصل اسفيري زمان كل السمح في رمضان زمان

امنية وحلم في رمضان ؟
أن يعيش السودان الامن والامان والاستقرار وأن تعود الحياة السودانية في أرض الخير والتاريخ الي الافضل والاجمل ،أحلم بسودان خال من العنصرية واتمنى العيد مع اسرتي.

وين شادية عطا المنان من القنوات ؟
السؤال مقلوب، أنا اعلم أن القنوات الفضائية مرت بظروف بالغة التعقيد في فترة حرب الكرامة ومع ذلك ابوابنا مفتوحة متى ماسمحت ظروفهم

بقولوا انتي زولة ما عندك صبر ومزاجية.؟
معايير التعامل وتصنيف الناس مختلفة ويتوقف على حسب وجهات النظر و المواقف التي نلتقي فيها وأي مكان لا أشعر بالانتماء فيه لا استمر معه

قالوا بقيتي بتاعت لايفات بس ؟
هو البقولو الناس شوية؟اعيد ترتيب الاولويات في شارع شمس الامنيات للاداب والفنون من خلال مشاريع مختلفة ومرئية والتواصل لا حدود له
وبعدين القالوا ديل حاسدين
الان فضاء الإعلام مفتوح والسوشل ميديا تتسع للجميع
وأنا صاحبة رسالة لاتعنيني الامكنة فاين ما اجد الشباك اصيب الهدف

حديثنا عن المبادرات والنشاط الاجتماعي ؟

الان يشرفنا أن تضيف في الحياة الاجتماعية السودانية
بناء الوعي المجتمعي القادر على بالاعتراف باخطاء الماضي والحضار واستخلاص العبر
المبادرة الوطنية للتعايش السلمي تحت شعار
توحيد الوجدان لبناء دولة المواطنة ونعمل على بناء وتعزيز المشتركات بين مختلف المكونات الاجتماعية

شادية مذيعة وصحفية وشاعرة لكن بعد دا كلو كسلانة ؟
هههههههه
ارفض الاتهام جملة وتفصيلا
السؤال فيه ظلم كبير لي
بالعكس مووووووجودة في زمن صعب وظروف مختلفة
لكن مواعين الاسيعاب بعيدة ولها معاييرها الخاصة
وعلى العموم الابداع يحلق خارج السرب وهذه سنه الحياة

اين انتي من الهلال ؟
في عمق القلب يجلس الهلال وفي مسام الروح يكون الحضور بلأزرق والرئه تتنفس هلال فانا موجودة مع الهلال بالقلب والوتين

مباراة الاهلي المصري
التوفيق للهلال والنصر حليف الأزرق

تقيمك لمجلس الهلال .؟

مجلس الهلال يستحق الاشادة والتقدير لإنه يعمل في ظروف عصيبة ويحقق النجاح
الان الهلال هو الفرح.