وإنفتحت (القلوب بيت بكا) !!

قزاز ورذاذ

وإنفتحت (القلوب بيت بكا) !!
القناعة هى أن تشرب (الكركدي) وتحس أنه (فراولة) .
كسرة :
رمضان هو من المناسبات الكبيرة التي تفتح (قلوب الناس بيت بكا).
نتذكر دوماً أعزاء صاموا معانا العام الماضي وهم الآن تحت التراب.
أخطر ما في وجع الرحيل أنه يتجدد مع كل مناسبة.
كسرة ونص :
أكثر حاجة إتفقنا عليها نحن في السودان هي : (الإحتفاظ بأكياس محلات الملابس التى نشتريها) .
لما نشتري ملابس من البوتيك بنحتفظ بالكيس .
في ناس بحتفظوا بالكيس تحت (اللحاف) وفي ناس بختوهو في (الدولاب) .
أى بيت سوداني تقريبا فيهو (أكياس محلات ملبوسات) .
عندنا غرام مع الأكياس .
مرات تشتري ليك (قميص) يكمل وينتهى ويكون لسه (الكيس الجبتو فيهو قاعد) .
يكون (الكيس فاضي وقاعد) .
خلاصة الموضوع (الكيس) عندنا بعيش أكتر من (القميص).
ثم أننا شعب حنيييين جداً.
طبعاً الكلام زمن كان عندنا دولايب وسراير قبل ما نصبح نازحين.
كسرتين إلا ربع :
قبل فترة قابلت الأخ عوض احمودي عازف العود الأشهر فسألته لماذا لا يبحث عن علاج لعمى العيون إذا كان ذلك ممكناً في ظل تطور الطب ؟ فأجابني : (عارف يا أستاذ أنا خايف لو ( فتحت) اتصدم في الناس عشان كده حتى لو العلاج ممكناً فمن الأفضل أن أبقى عميان).
كسرتين :
معنى الصداقة والوفاء والحب تجسد في قول سيدنا أبوبكر الصديق : (شرب رسول الله صلى الله عليه وسلم حتى إرتويت أنا) ..
هذه أعلى قمم الصداقة والمحبة .
مرات في حاجات بتعجبك لكن إنت بتتمناها تكون من نصيب زول تاني .
ممكن في الشارع تشوف ليك (قميص) لابسو زول وبينك وبين نفسك تتمنى لو القميص ده (حق صاحبك) .
ممكن تشوف (فلجة) عند فتاة ليس بينك وبينها معرفة وتتمنى أن تكون هذه الفلجة من نصيب خطيبتك .
إحنا واولاد حلتنا من عشاق الفلجة .
بنحب الفلجة والفلجة ما بتحبنا .
بنحبها وما لاقينها .
لو لقينا الفلجة ما بنلقى ست الفلجة ومرات بنلقى ( الست ) وما بنلقي الفلجة ..
و…و…
ويا استاذة : قالوا قبل الحرب في سوق ليبيا بعملوا (فلجة صناعية) ، عليك الله اعملي ليك واحدة .
و…و…
ما تنسي …. ليبيا بالخلا .
و….
ومن لمسات حنانك خلاص تمينا …… (حيطة الصالون الغربية).