عندي قروش

اصل الحكاية
حسن فاروق

بالله هو لسه صحفيين الإداريين المرتشين البشتموا اللاعبين والأجهزة الفنية قاعدين؟ انا كنت قايل الحقبة دي انتهت بنهاية الاسوا في تاريخ النادي صلاح ادريس لكن واضح إنه إدارة ( مافيا الوقود) امتداد ليها .. ودي مش مصيبة، انك بتأجر صحفي مرتشي ينقل مزاجك تجاه اللاعب الفلاني والمدرب العلاني، وبكون زي ماحفظونا في كتابهم الوسخان انه دي مقدمة للتخلص من فلان وعلان من اللاعبين، وده تاريخ عفن ماجديد بالمناسبة، اللاعب ومعادلة الإداري النجم التنافس هنا من يكون في مركز الاضوا اللاعب اللي هو أساس اللعبة، (وبقولها بفلسفة زول عارف) ولا الإداري اللي هو عامل مساعد زيو وزي كل مكونات المنظومة الرياضية، بداية الاتحاد الدولي لكرة القدم وحتى أصغر إدارة اتكونت في حلة وانتسبت لاتحاد محلي في المنطقة، ديل كلهم عوامل مساعدة شغالة كلها قصاد اللاعب وجميعهم بدون اللاعب عدم.
من المفارقات التاريخية برضو الجهل الإداري اللي بتعامل مع النادي والفريق جزء من ممتلكاته، وفي كلام إداري فاشل زي جمال الوالي كان بقول دائما بعد كل انتكاسة للفريق ( ماقصرنا صرفنا كذا مليار ودولار نعمل شنو اكتر من كده) وده فهم مفروض يدرس تحت ( كيف ننتج اداريا سيئا) ، ديل كلهم خشوا برنامج الكورة بالشباك وبطرق فاسدة، عشان كده بتلقى عدو الفريق واللاعب الأول هو الإداري صاحب المال او اللي مدخله ( عندي قروش) ، اول حاجة بيعملها لو استطاع يتخلص من اللاعبين اللي ماتم التعاقد معاهم في فترته، وهنا بيظهر دور الإعلام المرتشي في محاولة تكوين راي عام ضد هؤلاء اللاعبين، بعد مايتخلص منهم يبدأ في خلق صراعات داخل الفريق، ورصد لاعبين بسموهم ( مابسمعوا الكلام ) او ( ساي كده كرهوا ماعايزوا في الفريق).
الكلام كتير في الموضوع ده والتفصيل الممل، لكن مايهم انه الهلال الفريق حاليا في افضل حالاته جهاز فني ولاعبين قدموا الافضل في البطولة الأفريقية خرجوا من دور الثمانية وكسبوا فريق بدا يقدم كرة ممتعة انسجام وتناغم مهارات لصالح المجموعة تفوق تكتيكي والتزام جيد بالمطلوب في المباريات. لن أقول حافظوا عليه لأنه مستحيل مع عقلية ( شل شل كب لي جالون) الإدارية.