قزاز ورذاذ
محمد الطيب الأمين
والله يا حليل زمن الحرامي بيجي حفيان وشايل بطارية !!
داير تعرف السودان ده إتغير شوف (الحرامية).
شوف الحرامية هسه والحرامية قبل سنوات.
فرق كبير.
زمان الحرامي بيجيك بالليل بتشم فيهو (ريحة العصر).
والله صحي.
اصلاً كنا بعد الغداء بنستحمى وبنتعطر.
الحرامي كان (هدي ورضي).
تحس بيهو حرامي (ود ناس).
حرامي مننا وفينا وما حاقد علينا.
الحرامي شدة ما محترم والله يشهيك السرقة (أستغفر الله العظيم).
ما كان عندنا حرامي ما بسرح شعرو.
بجيك حفيان وشايل بطارية.
ولو بالغ بشيل معاهو سوط عنج.
بتذكر عندنا جيرانا جاهم حرامي.
والحرامي ده كان داير بتهم .
وهو للأمانة ما كان حرامي شديد.
يعني لما يكون مزنوق في قروش بسرق.
أتقدم للبت دي ورفضو.
قالوا (يدو خفيفة) .
يوم تلب ليهم بالحيطة شايل البطارية والسوط.
الزول ده لقى (أم البت) راقدة في الحوش قطع فيها زي (٥٠) سوط كده وبقي مارق.
زعلة بس.
دق الأم ولقي ليهو (نص دستة) ملايات مشرورة في حبل الغسيل شال ومشى.
الجانب العاطفي عند الحرامي كان كبير والله.
أنا شخصياً لو كنت حرامي ولقيتك في (زقاق ضيق) أول حاجة بقول ليك : يا اللخو سلام عليكم.
أنا والله يا أخوي ٩ طويلة.
وداير تلفونك وجُزلانك.
رأيك شنو؟
تقول لي لا ، طوالي بدخل فيك كف لما تشوف طشاش طشاش.
بعد الكف ده لو اديتني التلفون والجُزلان كتر خيرك ولو قعدت تعافر وتتعاور بجري بخليك.
والله كف واحد ما بزيدك.
والكف ذاتو لزوم احلل بيهو السرقة بس.
لشنو عليكم الله ساطور وسيف وسكين؟
ليه تقتل ليك إنسان عشان تلفون ؟
تقتل زول عشان تلفون وما خايف تقابل الله وأنت قاتل؟
لو الله ما هداك وما قدرت تخلي السرقة إستخدم (الكف) .
وأنا متأكد وسط كل (٥٠) نفر (أولاد وبنات) بتلقى ليك واحد بستسلم وبديك التلفون بعد الكف مباشرة.
خلوا السرقة تكون فيها (حبة ذوق) .
نحن الآن نبحث عن (الحرامي ود الناس).
الحرامي البراعي لظروفنا وصعوبة الحياة.
ياخ زمان الحرامي لو لقى جلابيتك بتاعت عيد الأضحى ما بشيلها بشيل جلابية عيد رمضان.
ذوق وأدب عجيب.
شيروا البوست ده للحرامية كلهم لكن ما تتاقوهم لي هنا.
أوع تتاقوهم .. أنا لا عندي (خد) للكف وكمان تلفوني شاشتو مكسورة .
و………
ويا أستاذة : أغرب حاجة كل يومين بسرقوا تلفونك وتاني يوم بلقاك شايلة تلفون أفضل من السرقوهو !!
و… و…
وليك مدة عني بعيد شلت الحنان ……….. و(شاحن الهواوي الأبيض وأوع تنكر).
Share this content:
