البرنسيسة معزة دسوقي ترتاح على صفحات الڤار
هناك تباين في موقف المذيعات في الحرب والتاريخ لن يرحم !!
ما عندي نفس اقدم أي شئ واحتاج وقت التعافي !!
رمضان من غير حلو مر مسيخ وناقص !!
هناك اسماء متل رغوة الصابون
بعد وفاة الحوت ما قدرت اسمع لأي فنان !
حاورها عمر الطيب الامين
صاحبت حضور واطلالة انيقة جوكر تنقلت في عدد من الشاشات والمحطات مذيعة متمكنة وصاحبت قاعدة جماهيرية كبيرة انها معزة دسوقي ضيفتي اليوم !
معزة ازيك ورمضان كريم ؟
عليكم السلام ورحمة الله الله ورسوله أكرم تصوموا وتفطروا على خير ان شاءالله
وين بلدك مع الدنيا الجايطة دي ؟
فى المملكه العربيه السعوديه. جدة
متين طلعتي من الخرطوم ؟
الايام الأولى من الحرب فى أبريل سيما وان منزلي فى جبرة وهي منطقة مواجهات مباشرة .
رمضان الان وقبل الحرب ؟
اااه .. رمضان بجيب معاهو كل الذكريات الجميلة فى السودان. ليس هناك مقارنه . فاقدة لمة الاسرة وكل يوم الفطور مع واحدة من خالاتى او صديقاتي. الحرب فرقتنا كل واحد فينا بقى فى بلد .بس نقول الحمد لله .
طقوس في رمضان ؟
طقوسى فى رمضان زى اي بيت سودانى، الاكل السودانى والعصائر السودانية محافظة عليها إلى الآن لكن للأسف السنة دى من غير حلو مر ودا لوحده احساس انو رمضان ناقص عندى.
امنية وحلم في رمضان ؟
بتمنى زى ماكانت بداية الحرب والمعاناة والنزوح فى رمضان. ينتهى كل شئ فى رمضان. وترجع البلد وترجع اللمة الحلوة لانه حقيقة رمضان أحلى فى السودان
معزة لا وجود لكي في القنوات لماذا ؟
بتصدق لو قلت ليك ماعندى نفس اقدم اى شئ من خلال اى شاشة. احتاج الى وقت للتعافى. الإعلام بداخلى ومتى ماوجدت نفسى مستعده سوف أعود. لكن حاليا افضل ان اكون بعيدة.
رغم الكمية الكبيرة من المذيعات الا ان المشاهد يحفظ فقط بعض الاسماء وهنا عدم قناعة بالمذيعات في الفترة الأخيرة ؟
عندما تجتهد وتترك بصمة تظل عالقا فى ذهن المشاهد ليس كل مايقدم يظل خالدا، هناك اسماء مثل الفقاعات سرعان ماتتلاشى ويبقى الاصل فقط.المشاهد السودانى فطن جدا فهو يعرف من يختار ومن يتابع وهنا تقع على المذيع المسؤولية فى الاجتهاد وتقديم مادة قويه
تظل لسنوات وسنوات.
قالوا خليتي القنوات عشان مافيها قروش ؟
ههههههههه انا ؟؟ معزة الدسوقي اخر من يفكر كده انا اعشق الإعلام ولا افكر فى العائد المادى بقدر تفكيرى فيما اقدم للمشاهد ، هو الإعلام متين كان فيه قروش؟؟؟ بالمناسبة فى اذاعة كنت شغاله فيها من غير ولا جنية .
لماذا لم تفكري في قناة حقتك في اليوتيوب ؟
الفكرو موجوده والمادة موجودة فقط تتوقف على متى ابدأ…دعواتكم فقط انهض واكمل.
منو قدوتك في العمل التلفزيوني ؟
من كل مذيع اتعلم ومازلت
بحكم حبى للأخبار استاذي ومعلمى د. عمر الجزلى
اما فى الجانب الرياضى استاذى واول من علمنى سطرا رياضيا الاستاذ الجميل الرشيد بدوى عبيد. احب معزة الدسوقي واكرس جهدى ان تكون شخصيتى مختلفه فى كل شئ
لانى انتظر اليوم الذى يأتى فيه مذيع ويذكر بأن قدوتى معزة الدسوقي
بتسمعي لمنو من الفنانين ؟
ياسلام سيد الغناء محمود عبد العزيز
تعرف بعد وفاته بقيت مابقدر اسم لأى فنان تحياتى لهم جميعا.
تقيمك شنو لموقف المذيعات والفنانين والفنانات في الحرب ؟
تباينت المواقف والاراء بين الجميع ومنهم من آثر الصمت. فى وقت كان يجب ان يكون الخط واضحا وهو الوقوف خلف الجيش السودانى لتحرير البلد. التاريخ لا ينسى وسيظل كل موقف عالقا بالاذهان والجميع لايرحم.حقيقة هناك اسماء ترفع لها القبعات، لهم منى كل الاحترام والتقدير
الڤار بتشكرك ؟
اولا أتقدم لكم بأسمى آيات الشكر لكل تيم صحيفة الڤار التى اتمنى لها دوام التميز
وتحية للشعب السودانى على الصبر والصمود وتحية للجيش السودانى صمام الأمان
وان شاءالله منتصرين
ويعود السودان افضل زمان.
Share this content:
