قزاز ورذاذ
محمد الطيب الأمين
الهلال خلى المريخ في حتة و(المارقوت) في حتة تانية ..
أكتر حاجة محيراني إنو ناس المريخ كانوا مصدقين إنو ممكن يغلبوا الهلال ويحرموهو من الأبطال.
صدقوا (الوهم) دا.
فرحانين ، جوا الملعب وكل لاعب لابس ليهو (سماعات) كبيرة وشايل (زمزمية).
نظام لعيبة كبار وكدا.
أنا ما مزعلاني إلا إنهم جوا شايلين (زمزميات).
ولابسين طبعاً شعارهم العامل زي (كبسولات النزلة) داك.
هسه في زول نصيح بلبس أحمر بالعصر ؟
جوا عاملين فيها نظام إنهم متصدرين وداخلين بي فرصتين.
وكل لاعب شايل ليهو (زمزمية) .
شكلو حركة (الزمزمية) دي إتعلموها في موريتانيا.
ظنوا وبعض (الظن إثم) إنهم منتصرين.
وبدت المباراة.
وعينك ما تشوف إلا روفا.
في (35) دقيقة الهلال خلى (المارقوت) في حتة و(المريخ) في حتة تانية.
لا بتفرز المريخ من المارقوت ولا بتفرز المارقوت من المريخ.
فكوا ليك فيهم (الشفاتة) القدام (كلود ، سالم ، الغربال وروفا) المريخ بقى ما فاهم أي حاجة.
يمسك الكورة جان كلود بجوا جاريين عليهو أربعة.
الكورة تمشي لأحمد سالم الأربعة بجروا عليهو.
تجي لروفا برضو يجروا عليهو.
لا نفعتهم السماعات ولا الزمزميات.
قوم على حيلك.
أنت ما بتعرف الهلال ولا شنو ؟
أنا مع الأربعة الكبار في أفريقيا أنت داير تجي بالمارقوت بتاعك دا تلعب معاي؟
والله أنا المزعلني أكتر إنهم كانوا مصدقين.
مصدقين إنهم ممكن يغلبوا الهلال.
غشوا جماهيرهم في نهر النيل قالوا ليهم تعالوا بدري الهلال تعبان.
الجمهور جا شاف حركات جان كلود جاهم وجع بطن وقتي.
واحدين جاهم وجع بطن وواحد حيرقان.
شافوا روفا جاهم طشاش ووجع في البنكرياس.
هسه أنا عاقل كدا بصدق إعلام المريخ دا ؟
أنا زول عاقل كدا معقولة أركب من الخرطوم لحدي الدامر وأدخل الإستاد من الساعة الواحدة نهاراً وأقعد مطمن ومنتظر المريخ يغلب لي الهلال ؟؟
هسه زول زي دا يقولوا عليهو شنو ؟
والله مصيبتكم مصيبة.
الجماعة كانوا خايفين من كلود طلع ليهو (جان روفا).
الهلال كلو (جانات).
هسه روفا دا جان ولا ما جان ؟
روفا براهو لو عملنا منو (فكة) بيعادل ليهو ستة من لاعبين المريخ.
روفا بلعب الكورة زي الما قاصد.
وبعد دا .. الهلال بدون إعداد وبي (14) لاعب شال النخبة.
أنت عامل ليك إعداد عشرين يوم وما خليت محترف ما جبتو وفي النهاية أخدتها أربعة والشمس فوق.
نحن عندنا تشكيلة كاملة خارج السودان.
لو جبنا ليك ناس كوليبالي وإيبولا والله تسعة ما تحلك مننا.
المهم ..
بعد النتيجة المريخ يرجع مكانو الطبيعي.
الكونفدرالية.
حتى لو الإتحاد العام قال المريخ في الأبطال نحن بحسابتنا المريخ في الكونفدرالية.
أصلاً إنتو بتلعبوا معانا في الأبطال (صحبة راكب).
والسنة دي ما في.
ترجع الكونفدرالية تلعب مع الغزالة النيجر والقطن تشاد والجنجويد ديل.
كدا كدا المريخ في الأبطال حدو التمهيدي.
عشان كدا أرجعوا الكونفدرالية.
كفاكم تمهيدي.
شبعتوا شبع في التمهيدي دا.
دا ما شكل فريق بيلعب في الأبطال.
فريقكم دا المارقوت (هد حيلو).
ما شفت لعيبة المريخ حيلهم ميت كيف ؟
دا المارقوت.
أصلاً المارقوت بهد الحيل.
أسبوع كامل هم بتغالطوا مع سيد الفندق.
قالوا الفندق فيهو مارقوت.
سيد الفندق قال ليهم : الفندق حقي دا مما عملتو ولتاريخ اللحظة دي ما دخل فيهو مارقوت ولا باعوض ولا ذباب ولا في زول شكى من الكلام دا.
إشمعنا إنتو تقولوا فيهو مارقوت ؟
بتغالطوا .. بتاع الفندق قال المارقوت تبع المريخ وناس المريخ قالوا المارقوت تبع الفندق.
أنا قدمت ليهم إقتراح .
قلت ليهم عشان تحلوا المشكلة دي أرحلوا من الفندق بس.
لو المارقوت رحل معاكم يبقى معناها المارقوت تبعكم.
ولو إنتو رحلتوا والمارقوت ما رحل معاكم يبقى المارقوت تبع الفندق.
رأيك شنو في المقترح دا ؟
مش مقترح منطقي ؟
قالوا لالا ما بنرحل.
ليه ما بترحلوا ؟
قالوا ساي ما بنرحل إتعودنا على المكان.
مكان ب(الماء).
هسه عليك الله دا ما كلام زول (المارقوت حقو) ؟
المارقوت داخل الفندق على مسؤولية صاحبه.
المشكلة كانوا مصدقين.
قالوا نودي الهلال الكونفدرالية.
والله عشنا وشفنا زمن المريخ بحدد منو يلعب في الكونفدرالية ومنو يلعب في الأبطال.
زمن أغبر والله.
لكن الحمدلله .. كل زول قعد في علبو.
أي زول في حجمو الطبيعي.
ملقطين ليهم محترفين بشبهوا (الحلاقين) الجمب (كبوني) ديلك.
أي واحد من المحترفين ديل أقطعوا فيهو (80) سوط وخلوهو يمشي يشوف مراكب ريدو وين.
بالمناسبة.
المريخ لما طلع بين الشوطين ليه تاني رجع الملعب ؟؟
المفروض تكتفوا بي شوط واحد.
كان على الهروب ما جديد عليكم.
المهم .. دي (بسبوسة فرح) وبكرة ح أكتب عمود (طعمية بيت البكا).
وغايتو السنة دي بالذات يا متنا من الضحك ويا كمان الضحك كتلنا.
و…….
زمان الناس هداوة بال وأنت زمانك … (مارقوت تقيل).