قزاز ورذاذ
وعلى الرمال أثارك طرتني ليلة عيد 💔
مرات بتقابلك (صرة وش) أحلي من البسمة.
ومرات كمان بقابلك (كلب سجمان) بدل هو يعضيك تعضيهو إنت وهو ينبح في الزول الجمبك .
أنا جني وجن الكلب البينبح بعد (الحدث) بمسافة .
بعجبني الكلب البيصنع الحدث .
مع هذا الحرب لا أظن أن هنالك كلب سوداني مازال قادراً على (النبيح).
الصوتو ما راح بيكون مات خوفاً.
كسرة :
حبيبنا إسحاق الحلنقي عندو (حسادة حميدة) .
حسادة الحلنقي بتخليهو لو بكى يبكي معاهو الناس.
أصلو ما ببكي براهو.
ضُر كده بس.
كنت من قبلك بشيل الليل دموع
وأطويه هم
أنا كنت بخشي علي الأماني الطفلة يفنيها العدم
وجيت لقيتك بين ضلوعي شموع
وغنيتك نغم يا نغم
يواصل حلنقي في بكاء فاضح :
عدت من بعدك رجعت عشت متغرب وحيد
وإبتديت أشعر بزهر العمر يتساقط بعيد
ياحليلك انت والأيام ربيع أخضر سعيد
كنت ببكي عليك بعمري والدموع بس ما بتفيد
حلنقي هو أغلى زهرة تفتحت في بستان الشعر الغنائي.
قال :
و(على الرمال اثارك طرتني ليلة عيد) .
البيت ده فيهو شجن ما عادي يا حلنقي.
كسرة ونص :
أدفع ثلاثة سنوات من عمري الوحيد وأشوف منظر أطفالنا طالعين من حدائق المقرن و 6 أبريل وماجك لاند وبري العائلي والزوادة بحري .
كسرة ونص وخمسة :
نجوم المجتمع السوداني الموجودين بمصر هم بحاجة لود حلال يذكرهم كل 48 ساعة ويقول ليهم (السودان فيهو حرب).
شكلهم ناسين.
كسرتين إلا ربع :
في بيوت الأعراس عادة (جمال الحفلة) عندو علاقة بـ(بنات الحفلة)
لو الحفلة فيها بنات سمحات معناها الحفلة ح تطلع سمحة حتى لو الفنان ما عندو (صوت) .
والزمن ده طبعا الفنان بتلقي عندو أي حاجة ما عدا (الصوت) .
والله صحي .
زمان في حلتنا عندنا (خمسة بنات سمحات) .
والباقيات كلهن بشبهن (سادومبا) .
واحدات بشبهن (سادومبا) وواحدات بيشبهن (افياني) .
وكمان في واحدات بيشبهن (شلباية) .
المهم .
لما تكون في حفلة في حلتنا إحنا من النهار بنعمل (إستطلاع) عشان نشوف البنات الخمسة السمحات جايات الحفلة ولا ما جايات .
بنستطلع (أخوان) البنات الصغار .
بنقول للشافع : (الليلة إنتو جايين الحفلة) ؟؟
لو قال جايين معناها ح يجي مع أختو .
ولو قال ما جايين معناها أختو ما جاية .
كده بتكون في واحدة ما جاية .
الباقي أربعة .
يعني لحدي ما العصر يجي إحنا بنكون قدرنا نعرف شكل الحفلة ح يكون كيف بعدين .
والله صحي .
مرات بيصادف الخمسة بنات ما بيجو .
تلقي الحفلة عاملة زي (معسكر فريق مازيمبي) .
أحلي زولة في الحفلة بتكون بتشبه (ساماتا) .
وكمان مرات بتجي واحدة من البنات الخمسة وبتمرق قبل نهاية الحفلة .
هي تمرق بهنا وإحنا نمرق بهناك .
وإحنا جننا وجن الحفلة البيكون فيها بنات ومع ذلك بتحس إنكم (عزابة في الحفلة)
كسرتين :
الإنحراف في المسلسلات السودانية أسبابه (دولار المشاهدات وكسب الشهرة عن طريق قلة الأدب.
الله المستعان.
و.. و..
ويا أستاذة : لو قلت ليك خبيزكم بتاع السنة الفاتت لسه في طرف لساني بتصدقي؟؟
و……
وكان نفسي أقوليك من زمان …(لستك) القروش ما فيهو (أنبوبة).
Share this content:
