صراع اللايكات .. والألفاظ البذيئة يا أولاد ويا بنات الحلال ..

قزاز ورذاذ
محمد الطيب الامين
صراع اللايكات .. والألفاظ البذيئة يا أولاد ويا بنات الحلال ..

من أسوأ سيئات هذه الحرب اللعينة إنها أدخلت مفردات ساقطة وألفاظ بذيئة ما كانت تطول مسامع أهل التربية والفضيلة والبيوت المتماسكة.
ألفاظ الشوارع وقاع المدينة التي تمثل (خطاب رسمي) لشماسة المليشيا ، للأسف الشديد أصبحت الآن عادية وغير مستنكرة وسط الميديا.
المليشيا دا اسلوبهم ودا كلاهم ودي ونستهم ودي تربيتهم.
هو لو (ود ناس ببقى دعم سريع) ؟
ما سقطة أخلاقية أكبر من إنك تبقى دعم سريع حرامي وسفاح .
ديل شماسة لا عندهم أخلاق ولا تربية ولا أدب.
انت بتنقل التفاهات والألفاظ دي لشنو ؟
بتنقلها في الميديا وفي صفحتك الفيها عمك وخالتك وأبوك لشنو ؟
داير تورينا شنو يعني ؟
صراع (تكبير الصفحات واللايكات وعدد المشاهدات) للأسف الشديد جعل الناس في سباق مؤسف لنشر (ألفاظ الشماسة) دون حرج وللأسف معظم أصحاب النشر بنات.
يا جماعة والله والله والله صفحاتكم ممكن تكبر بدون نشر قلة الأدب.
والله ممكن تلقوا لايكات بدون نشر الألفاظ.
في الحرب دي فقدنا أرواح وبيوت وممتلكات وفقدنا قلوبنا ووطنا.
عليكم الله الحد الأدنى من أخلاقنا حافظوا عليهو.
الحرب الآن على وشك النهاية ، قريباً ستنضف دارفور وكردفان.
كفاية الفقد الفقدناهو في الحرب.
حافظوا على المسامع والذوق والأدب.
ما تنشر فيديو فيهو ألفاظ.
والله ما ح تستفيد حاجة.
وصفحتك ممكن تكبر بدون الحاجات دي.
أطلقوا مبادرات ترقية الذوق و(تنظيف السمع).
خلي يكون عندك إنضابط ذاتي ومراقبة ومخافة من الله وإحترام ليك وللناس البتابعك.
ملعونة اللايكات البتضغط على أخلاقنا دي ياخ.