قزاز ورذاذ
محمد الطيب الامين
أهلنا قالوا بشوف (القلب).
وأنا شوف قلبي بعد رمضان الجاي ده ، طلاب المدارس لابسين الزي المدرسي ومنتشرين في شوارع السودان لا نخشى عليهم إلا من الركشات والكلبة الولادة .
المواصلات شغالة ، جاكسون زحمة ألف ، المنقة والبرتقال أبو صُرة في الصينية المركزي ، دخان الأقاشي في السوق العربي ، ناس الشرائح فارشين الأرقام المميزة جمب الجامع الكبير ، شارع الدكاترة طه سليمان يغني (نسعد بحضورهم وغيابهم ببكي) ، كبري توتي ، محطة سراج ، شقلبان وسوق ستة ، كبري الحلفايا والدخينات ، كوبر وشارع الستين ، إستاد الهلال وبنات الأحفاد وشعبي أم درمان ومحطة اللستك .
حافلة طالع منها صوت دلوكة وزغاريد ماشة أسبارك ستي ، سوق السمك وعربات طالعة من مقابر حمد النيل وسوبا الحلة.
جبرة وسباق الخيل ، الكرين واللفة والجريف واللوبيا ، محمد سيد حاج شغال في كافتريا العصير حقها مسيخ وخفيف .
سوق ليبيا ، الجموعية شارع الإذاعة وأمبدة السبيل .
7 شباب بدفروا في عربية تقسيمتها من زمان عالية ، (ست تسالي) تشتري منها كيسين وتديك زيادة قدر الكيسين ، شارع النيل وبوكس جمل شايل 32 نفر فضل ظهر .
والنيل يلمع وريحة ند من هايس شبه جديدة .
حوادث أم درمان ، المشتل والمك نمر الشارع والصيدلية .
ده السودان ، قريب وقريب جداً ح تعيشوا التفاصيل دي وح تقولوا محمد قال .
أبتسم والله الجاي كلو خير .
شارك الخبر على:
