محمد الطيب الامين يكتب كشح موية العدة

كشح موية غسيل العدة الفيها (عضُم) مُستعمل ؟؟

بتتذكر (موية غسيل العِدة البكشحوها قدام البيوت).
بتتذكر الموية دي بيكون فيها (عضُم مُستعمل) و(باقي رغيفة) و(نص ليمونة) و(بصل صغار كده)؟
بتتذكروها صاح؟
أنا إشتقت ليها.
أكتر حاجة إشتقت ليها هي تفاصيل (عرس سوداني) في حِلة شعبية في بيت مليان (عمات) و(خالات) وأطفال ما ليهم عد.
صوت دلوكة ولمة ناس في خير.
نخيل الجرتق والعنقريب وصينية الحِنة.
صوت عرفة لما تخمج الدلوكة غنااااية.
وصور محفورة جواي.
الإستعداد للحفلة.
الكشافات .. واحدة حمرا وواحدة بيضا.
العريس اللابس (على الله الجديدة).
أُخت العريس لما تخت ليهو التلفون في أضانو عشان يدينو مشغولات بالحِنة ويتكلم مع خالو في السعودية ويبارك ليهو.
الضبيحة.
التور والخروف.
نسوان الخدمة.
الخضار.
بوماستك العرس والبُوهية اللينة.
المراتب الجديدة.
والملايات.
المكوة في بيت العرس.
الجيران البدوكم الصالون حقهم لاستقبال الضيوف.
خبيز العرس.
بلح الشام.
بداية الحفلة.
بنات حلتنا السمحات لما يجن طالعت في إناقة وسرور.
الكعب العالي.
والتعب.
الناس الجايين مخصوص للعرس.
الزغاريد.
مُلاح التقيلة التقيل.
الروب.
والمرا المتخصصة في سلطة الأسود.
ريحة البخور.
العدة البجيبوها من الجمعية.
ما تنسوا الاباريق.
صفاء وين ؟
صفاء معاها عبير وسارة وسلمى مشن سوق أم درمان يجيبن حاجات الحِنة و(الهلال) .
بنات في عمر الزهور بمشن سوق أم درمان لابسات عبايات.
لا إرتكازات ولا زفت.
أكوي لي جلابيتي.
مطبقتي ختيتها ما لقيتها.
صالون الحلاقة.
هبهان الشاي.
أمل وهالة وسجى وحنان في الكوفير من صباح الرحمن.
كباية الشاي البتكون مجدوعة تحت شجرة الليمون.
كرسي المناسبة الأحمر.
منو البدق الصيوان.
شوفوا مصعب وياسر وعوض.
عوض معاهو عمر بدقو في صيوان النسوان.
عربية الزفة المُزينة.
شُفع بتجاروا بين الكراسي والكوانين.
شوال الفحم.
التلج.
والبكسر التلج.
والحافظة الكبيرة القاعدة في الكرسي الأحمر جنب باب الشارع.
مسجل شغال بأعلي صوت.
يا الله.
يا حليلنا والله.
المراهقين البعاينو بفتحات الصيوان.
اعمامك الكبار عاملين كوم غير بعيد من باب الشارع ويتونسوا.
ذكريات.
ويا ولد القهوة.
والشاي.
سكرك كيف.
معلقة بس.
نحن بنموت يومياً.
الموت ما طلقة بس.
ولا دانة.
أرواحنا بتطلع وبترجع تاني عشان تطلع.
دي ما حرب.
ده موت للبلد.
انا محمد ده تعبت جداً والله العظيم.
اشتقت للأهل والناس.
لصباح حلتنا والمغرب والعشاء.
اشتقت لنص النهار ولدكاكين حلتنا وأولاد الحلة.
للباسطة والفتة والعرق والعراقي.
لو رجعنا وين نلقي اللمة.
منو البكشح موية غسيل عِدتنا وفيها (عضُم) مُستعمل؟
هم ما سرقوا البلد .. هم سرقوا حياتنا وحبنا وروحنا.
سرقوا السمح فينا.
الله يسرق عافيتهم يارب العالمين.
#محمد_الطيب_الأمين