اصل الحكاية
حسن فاروق
قبل ماتواصل في ذبح ابوعشرين اشرح لينا يالزعلان انك فقدت الصدارة مؤقتا لأنك لسه بتلعب ع اطناشر نقطة في الملعب بصراحة مامتابع كويس، وانت كنت قاعد في الصدارة بفارق نقطة من الكنغو التاني ونقطتين من السنغال تالت الترتيب، لا الكنغو فرشت وفتحت بيت بكاء، ولاقالت انتهينا، ولا جابت سيرة لاعب، ولا السنغال بعد ما اتعادلت معانا قبل تلاتة قالت باي باي كأس العالم ضاااع الحلم، ولامدرجاتهم وصحافتهم ضحكت وسخرت من الاسطورة ساديو ماني الدخل المباراة نضيف وطلع انضف. المشجع لما يكون جاهل والإداري أجهل ياهو بطلعك من المنافسة قبل ماتطلع، بفهم انه منتخب جنوب السودان ضعيف، والكورة ماتتبني ع قاعدة الضعيف والنتيجة الفي الجيب، السنغال والكنغو وجنوب السودان وبكره ممكن موريتانيا وتوغو، قلبوا صفحة المباراة الانتهت وركزوا في مباراة اليوم، وحققوا المطلوب ممكن شهر تسعة يتعثروا. ويتفوق السودان وتتغير المواقع في روليت المنافسة، وده كلو بيحصل كيف لما تقلب الصفحة مباراة انتهت وانت لسه في المنافسة وبقوة كمان قبل تلاتة يوم كنت متصدر بفارق نقطة واااحدة، حاليا انت متأخر عن الصدارة بنقطة واااحدة برضو.
بعدين الأهم انت ياصاحب الحلم الضائع ممكن تشرح لينا بنيت حلمك ده علي شنو؟ اشرح لينا بالله واحد اتنين تلاتة تخلي في حلم من اساسو، منطق الكورة بس وعلي الورق. مانخش الملعب التفاصيلو تختلف عن الورق ، اشرح لينا عشان نفهم بدل لطم الخدود والولولة الحاصلة دي. اشرح لينا الخلاك تحلم شنو؟.
ابوعشرين ماف حاجة تخلي يعتزل، ولو لاعب صاحب عقلية احترافية ده شغلو واكل عيشو يقلب الصفحة ويضغط نفسو اكتر ، والاهم يصمد في وجه حملة السايقنها هم ذاتهم جزء من الفشل. وطبعا في شغل كبير مفروض يقوم بيهو الجهازين الفني والإداري لانهم افهم انه الكورة لعبة مستمرة، وفريقك في المنافسة وبقوة كمان، وماممكن تنسف ده كلو وترهنوا لمزاج مشجع.
Share this content:
