الحرب ح تنتهي بالاقساط ونحن الآن في آخر قسط ..

قزاز ورذاذ
محمد الطيب الامين
الحرب ح تنتهي بالاقساط ونحن الآن في آخر قسط ..

زي ما غنينا مع ود اللمين (ليلي دون الناس كل آهات) ح نغني مع ود اللمين ذاتو (وداعاً يا ظلام الهم على أبواب ما تعتب ومرحب يا صباح الحب قرب تعال ما تبتعد).
ناس كتيرة يومياً بتنوم وعلى المخدة دمعة ، وناس أكتر بتنوم بدون مخدة.
ناس بتصحى والعيون فيها (لمعة دمعة بايتة) .
كمية (البندول) البلعناهو في الحرب دي ما حصلت.
نحن والصداع بقينا أكتر من قرايب.
ومع البندول ما بنغيب عن بعض لحظة.
كمية الدمار الحصل والقسوة الحصل بيها الدمار بتديك إحساس إنو حياتنا ما ح ترجع زي زمان.
لكن صدقني .. الحرب والله في خواتيمها.
ح تنتهي.
ح تنتهي لما أنت ذاتك ما تصدق كيف انتهت.
بترجع بيتك وشغلك.
وتقعد تتذكر (المرمطة الحالية دي وتضحك).
ملامحنا الإتغيرت من الهم والحزن بكرة الفرح يزوها ونزدهر زي (زهور الربيع).
دي شدة وعلى زوال والله.
و……
شفتو كيف صافي ومسامح
القليـب الأنـت جارحـو
سبتـو ضايـع بالسنـيـن
ولحظة صورتك ما بتبارحو
أمـا قلبـك يـا المعـانـد
الله يغفـر ليـو يسامحـو
والصـدود الجـوة فيهـو
باينة في عينيـك ملامحـو