قزاز ورذاذ
محمد الطيب الأمين
المسافة الواقعة بين الباعوض وجسمك..
لما جات كورونا في ناس إستثمروا في (المعقم).
بعرف لي واحد عمل ليهو (ركشتين) و(خطب) من تجارة المعقم.
مشى خطب ليهو واحدة و(سد مالو) من عائد الإستثمار في المعقم.
فتيل المعقم بي خمسمية وهو ببيعو للناس بتلاتة ألف.
أقول ليك مشى خطب عديل.
حصل شفت ليك زول بخطب في فترة كورونا؟
وفي ناس إستثمروا في (الكمامات).
وفي ناس إستثمروا في (فيتامين سي).
دا غير البرتقال.
الزمن داك البرتقالة الواحدة بقت أغلى من (كيلو اللحمة).
واللحمة شايل المكسر.
وهسه في زمن الحرب في ناس عملوا قروش بعد ما إستثمروا في (أوجاع الناس).
وأبشع إستثمار إتعمل هو الإستثمار في (حمى الضنك) .
وقبلها الكوليرا.
في تجار وسماسرة قاعدين في المسافة الواقعة بين (الباعوض وجسمك).
وديل لو عليهم (يربوا) الباعوض تربية عديل عشان يكتر ويكبر لأنو هم رأس مالهم (دمنا).
الدم حقنا هو رأس مالهم.
يرفعوا سعر الدِرب والحقنة والناموسية وحتى الكفن.
كان مؤلماً جداً منظر المواطنيين في أم درمان وهم يقفون صف من أجل الحصول على الدِرب.
مؤلم جداً ما تفعله حمى الضنك بالناس.
ومؤلم أكثر ما يفعله الناس بالناس.
الحكومة يجب أن تعلم إن المليشيا ما على شرط تلبس (كدمول) .
في مليشيا قاعدة وسطنا وهم أخطر من (حميدتي الحمار) والشماسة المعاهو.
الحكومة زي ما (رشت) الباعوض عليها أن ترش (الباعوض البشري) برضو.
الحكومة وعبر وزارة الصحة أعلنت إنو إعتباراً من اليوم ح يتوفر علاج حمى الضنك مجانًا.
لكن الحكومة لو ما حسمت (الباعوض البشري) ح يحصل سحب للدواء المجاني وتكديس ومن ثم سوق أسود لاحقاً.
ولذلك أضربوا وبيد من حديد (جنجويد الدواء) القاعدين وسطنا وبيمصوا في دمنا .. هم قبل الباعوض.
#محمد_الطيب_الأمين
شارك الخبر على:
