قزاز ورذاذ
محمد الطيب الأمين
نازح متفلسف وبيدس (المعجون) ..
أي زول نزح في فترة الحرب عندو قصة مع النزوح.
قصتك مع النزوح ممكن تكون قصة جميلة وممكن تكون حزينة .
أنت وحظك .
ممكن تنزح لناس يخلوك تسب لحميدتي على رأس كل دقيقة .
وممكن النزوح يوديك محل يخليك تحمد الله علي النزوح.
العيب مرات بيكون في (المنزوح إليه).
ومرات العيب بيكون في (النازح) ذاتو .
في نازح بيكون دمو تقيل جداً .
والله صحي .
النازح المتفلسف متعب شديد .
تلقاهو متفلسف وبالذات في موضوع (الأكل) وقصة الموية.
يقول ليك : كيف بتشربوا من الترعة دي ؟
وفي نازح بيكون عارف إتجاه ا(لقِبلة) لكن مع ذلك بيسألك يومياً من تجاه القِبلة .
كل يوم يقول ليك القِبلة على وين ؟
دا غير النوع الكل ما يشوف ليهو حمار حايم في الحلة يقول ليك الحمير دي ليه بتلف بالنهار في الشمس دي ؟
يقول ليك وين جمعية الرفق بالحيوان ؟
هو لو في جمعية رفق بالحيوان أنت ما كان نزحت اصلاً .
قوم على حيلك .
عشان كدا مرات يا جماعة المشكلة بتكون في النازح ما في (المنزوح إليه).
وكمان في ناس نزحت لناس كانوا بدسوا منهم حتى (المعجون) .
وعاملوهم معاملة كعبة شديد .
خلوهم يندموا إنو طلعوا من بيوتهم .
يشربوا بيهم القهوة عديل .
علاقات خربت عديل في النزوح وعلاقات إتبنت من جديد .
قصص النزوح فيها المضحك وفيها الببكي وفيها المليان ألم.
والله في ناس من يوم نزحت تبكي لحدي ما رجعت .
يبكوا من قسوة المعاملة والشافوهو .
النزوح عمل ليهم جروح في الروح والشعور .
والعكس .. في ناس لقوا معاملة خمسة نجوم .
أنا مهتم جداً بالتوثيق لقصص النزوح .
وبفتكر إنو كل قصة تصلح للنشر والتداول لأنو فيها دروس كبيرة .
والحمدلله أملك مجموعة كبيرة جداً من قصص نزوح غاية في الوجع .
بحاول أرتبها وأنشرها.
وأكثر قصة مليانة وجع قصة أسرة نزحت وتعرضت للسرقة داخل البيت النزحت ليهو .
سرقوهم بنات البيت ذاتو .
اتخيل تنزح عشان شماسة حميدتي ما يسرقوا (دهيباياتك) تقوم تكتشف المحل النزحت فيهو أولادهم حرامية .
المهم .. بتمني الناس توثق للنزوح .
كل زول يكتب قصتو بدون خجل .
واكيد في قصص جميلة بتشبهنا وبتشبه أخلاقنا.
وكمان في قصص زي الزفت .
و…..
ولما تحكي ذكرياتنا
كنت تحكيها بأمانة
كيف بدت وكيف إنتهت
وإتبددت قبال أوانها
وكيف أمانينا الجميلة
حلت الآهات مكانها
كفاية أشوفك في خيالي
و أستعيد أحلى الليالي
و أبكي أيامي الخوالي
و كل ماضي الذكريات
#محمد_الطيب_الأمين
شارك الخبر على:
