قزاز ورذاذ
بقلم:
محمد الطيب الأمين
- يوجد فريق كبير جداً بين الزول (المتعاون مع الجنجا) و (الزول القاعد في مناطق سيطرة الجنجا).
- الفرق شنو ؟
- القاعد في مناطق سيطرة الجنجا في الجزيرة أو جنوب أم درمان أو الخرطوم أو بحري أو دارفور أو كردفان هو إنسان قاعد في بيتو.
- قاعد في بيتو ليه؟؟
- والله هو حر ، يقعد في بيتو ولا ما يقعد ، ده قرار حقو هو وهو حر في قرارو.
- يمكن ما عندو قروش يطلع بيها عشان يسافر أو يأجر بيت أو يمكن ما عندو زول يمشي عليهو .
- ويمكن قرر ما يطلع لأنو لو في موت عايز يموت في بيتو.
- طيب قاعد كيف مع الجماعة ديل؟؟
- قاعد عادي لا بسألهم ولا بسألوا ، ولا بشكر الجيش قدامهم ولا بفرح بالإنتصارات.
- طيب والمتعاون ؟
- المتعاون ده شخص قاعد في مناطق سيطرة الجنجا ومنداح جداً.
- بصحى الصباح بستحمى بصابونة (لوكس) مسروقة ، وبأكل بملأ بطنو بأكل مسروق ، وبلبس ملابس مسروقة.
- وبطلع الشارع بقول للجنجا : البيت البابو أسود داك عندهم خالهم شغال في شرطة المطافي.
- وأخوهم الكبير عندو هايس.
- وعندهم حبوبتهم عندها غسالتين وشاشة ، وفي الشارع الوراهم عندهم ود خالهم شغال في البنك عندو أكسنت مضلع وركشة.
- ده المتعاون.
- منداح وهو أسوأ من الجنجا تقريباً.
- ده الفريق بين المتعاون والزول القاعد في مناطق سيطرة الجنجا.
- ما في اي مقارنة بينهما.
- فرق السماء والأرض.
- عشان كدا أي متعاون يتقبض ويتم التأكد من إنو متعاون ما ترحموهو.
- أنزلوا عليه أقسى وأقصى العقوبات.
- مع ضرورة التحري والتأكد حتى لا يظلم الذي كان متواجداً في مناطق سيطرتهم ولم يعاونهم.
- ما أي مواطن قاعد في مناطق الجنجا متعاون ، ودي نقطة مهمة ولازم تتأكد منها بعد داك تقرر ح تعمل شنو في الزول الجاك من مناطق سيطرتهم.
- ثبت إنو متعاون طوالي لحقو أمات طه.
- طلع مواطن عادي تفكو ويمشي معزز مكرم.
- ح تقولي لي ويعرفو كيف متعاون ولا متعاون؟ بقول ليك : ده ما شغلي أنا.
شارك الخبر على:
