أعمل حسابك (البُوهية لينة)..

أعمل حسابك (البُوهية لينة)..
من سلبيات (البُوهية) إنها تترك أثر في الجسم وفي الملابس وذلك عندما تكون (لينة) .
تحتاج البوهية للهوا حتى تنشف وتثبت .
(البوهية اللينة) سريعة الإلتصاق .
لو لصقت في (قميصك) ما بتطلع بأخوي وأخوك ..
بتذكر زمان كان عندي قميص (كم طويل) إسمو (مشوار المساء) ، القميص ده لصقت لي فيهو بوهية صفراء خربت اي حاجة ..
القميص إسمو (مشوار المساء) لكن كنت بخصصو لـ(درس العصر) ..
والله صحي ..
طبعاً درس العصر لازم تلبس ليهو أجمل ما عندك لأنو (البنات) في درس
العصر ما بعاينن إلا للولد (القاشر كويس) ..
البت في درس العصر بتجي لابسة (توب) أمها ، ونحن ما بنقدر نلبس جلاليب الأباء عشان كده بنخش في قميص (كم طويل) إسمو (مشوار المساء) .
وأنا كان رأس مالي (قميصي بتاع مشوار المساء أبو كم طويل) .
ولسواد حظي لصقت لي فيهو (بوهية لينة) .
غسلتو بالبنزين ما نفع ، عملت ليهو (سنر) ما نفع ، (جاز) ما نفع .
في النهاية (قطعت الكم وعملتو نص كم) .
بعد بقى نص كم سميتو (مشوار العصاري) ..
سميتو كده ..
وأى زول طبعا حر في (تسمياتو) ..
المهم ..
أكتر يوم بتشتهر فيهو (البوهية) هو آخر يوم في رمضان ..
(يوم الوقفة) دائما بتلقى الأطفال في البيت يتعرضون للضرب بسبب البوهية اللينة ..
الشافع بيجي بدون قصد بيهبش الشباك أو الباب أو حتى التربيزة بيهبش
و(البوهية لينة) ..
بياخد ليهو (علقة ساخنة) عشان هبش الباب و(البوهية لينة) .
الآن وفي زمن الحرب والظروف الإقتصادية سقطت كثير من (مستلزمات العيد) .
خرجت (البوهية) ولم تعد .
خرج البوماستك ولم يعد .
خرج (تنجيد المراتب) ولم يعد .
قبل العيد كانت كل الأسر تقريباً بتشيل مراتب البيت توديها عشان (تتنجد) .
أصلاً المراتب يتم تنجيدها في مناسبتين أتنين : العيد والعرس .
لو في عرس في البيت كل المراتب يتم تنجيدها.
خرج الناس من البيوت ولم يعودوا .
بل خرجت الروح ولن تعد .
الله المستعان .
و…….
ويا أستاذة : زمان كنا بنجي (نعيد) ليكم أول يوم وتاني يوم عشان نشوف تسريحة شعرك بتاعت (ضنب الحصان) .
و..و..
وجيت أهنيك وأصافحك وجيت أقول ……. حاسب (البوهية لينة) .
#محمد_الطيب_الأمين