الهلال يلعب بالمريخ المباراتين الجايات .

قزاز ورذاذ

بقلم:
محمد الطيب الأمين

قالوا الفنان الراحل إبراهيم الكاشف زمان (بقدم الفنانين).
الفنان المظلوم إعلامياً بيظهر مع الكاشف.
تمشي معاهو الحفلة.
هو بغني الفاصل الأول والفاصل التاني.
الفاصل التالت (بعد عشاء الفنانين).
في الفاصل الرابع الكاشف بخليك تغني.
وكونو تغني في حفلة الكاشف زي الغنيت في التلفزيون.
ولا ما كدا يا الحبيب عوض بابكر.
حبيبنا عوض بابكر (حقيبة الفن) موجود معانا في الصفحة هنا وهو رجل موسوعة وغني عن التعريف وهلالابي عيان.
سأكتب لأحقاً عن عوض بابكر الرجل الرقيق الذي ينطق موسيقى ويمشي بين الناس نغم ، ويكفي إنه ركن من أركان الإذاعة السودانية.
عوض بابكر فنان ما بغني.
المهم.
الكاشف بعد يثبت الجمهور ويعبر بالحفلة لبر الأمان بقدم زميلو.
وبما إن ذلك كذلك فإن هنالك مقترح أن يقدم الهلال زميلو المريخ ليكمل إنابة عنو.
الهلال ضِمن التأهل.
وباقي ليهو مباراتين.
ما محتاجين ليها والله.
هي مباريات لتحسين المركز .
عشان نتصدر المجموعة.
عشان نكسر أرقام.
لكن كدا كدا إتأهلنا.
ممكن نلعب بالصف التاني.
وممكن نلعب بالصف التالت الذي هو المريخ .
ولو الكاف بوافق والله بنخلي المريخ يلعب بدلنا.
بنقدم المريخ.
على الأقل يتحركوا شوية.
قعدتهم طالت.
ونحن أولاد بلد.
والناس بالناس.
يلعب المريخ المباراتين والهلال يرتاح شوية.
أصلو ما ظريفة المريخ تسعة شهور وعشرة أيام قاعد في موريتانيا يأكل ويشرب ويخسر.
لا بزهجوا من الاكل ولا بزهجوا من الخسارة.
وأنا أكتر حاجة بتعجبني في المريخ إنهم قنوعين بحالهم.
ما بحبو يغيرو وضعهم.
لا بفكرو يجيبو واحد زي جان كلود ولا واحد زي كوليبالي.
ولا زي العليقي.
مسكوا في عمر النمير الهلالابي ده وأقتنعوا بقسمتهم.
بالمناسبة .. المريخ أفضل ليهو يرجع السودان والله.
أنزلوا السودان وخلوا الإتحاد العام ينزلكم برمجة الدوري الممتاز.
الشغل الفي موريتانيا دا ما بتقدروا عليهو والله.
بعدين لو ما رجعتوا السودان مباراة القمة قربت.
وبراكم شايفين الهلال كيف.
ما في فريق عاقل بنتظر ليهو فريق بيلعب فيهو إيمي وكلود وكوليبالي وفوفانا وماديكي وروفا والغربال.
دي مخاطرة ساي.
عندك فرصة هروب أهرب من هسه .
أنزلوا السودان (تلقوا الخُدرة وتنسوا الهم).
بلادك حلوة أرجع ليها تاني.
الهلال في موريتانيا ما برحم.
المريخ عليه أن يحفظ كرامته ويعود للسودان.
أعملوا ليكم أي دراما وارجعوا.
قولوا الأكل في موريتانيا ما نفع معانا.
أو قولوا الموية مالحة.
أو أي (وهمة) عشان ترجعوا بيها البلد.
امبارح قالوا خسروا عشان يشيلوا المدرب.
كويس والله.
أنا خايف المباراة الجاية تخسروا وتقولوا خسرنا عشان نشيل الطبيب.
لحدي ما تلاقونا وتاخدوها سبعة إن شاء الله.
المهم.
ارجعوا.
قعدة زي دي والله ما حبابا.
يجوا عائدين يا الله عائدين.
يجوا عائدين أخوان رمضان المنهزمين يا الله .
ولو في مشكلة في حق التذاكر ممكن العليقي من حافز الكاف البالغ مليون دولار يطلع 200 ألف دولار للمريخ.
عشان يرجعوا بيها.
الناس بالناس.
وتبكو بس .. عين قطرة وعين مس.
و.. و..
بقيت تمر بينا ومحال تجي علينا ولا بتقول ديل ناس ….. بينا وبينهم زلط بس.