الشهادة عالية والأخلاق واااطية

قزاز ورذاذ
محمد الطيب الأمين
الشهادة عالية والأخلاق واااطية
(6) بجنيهين و(9) هُوادة !!

أكبر (عورة) كشفتها الحرب هي أننا لم نستفيد من (التعليم) .
والله صحي.
(700) جامعة ومعهد عالي.
(1345) مدرسة ثانوي.
(1578) مدرسة أساس.
(2343) روضة.
والمحصلة صفر.
ما عارف نحن قرينا شنو؟
التعليم ما ظهر فينا.
ولا ظهر علينا رغم أننا قرينا .
الحرب دي أثبتت إنو ما عندنا تعليم.
إن لم يظهر التعليم في الأخلاق والسلوك فلا داعي له.
لو لم يُهذب التعليم النفوس والضمائر بلاش منو.
شن فايدة عِلم ما علمنا.
وشن فايدة شهادة عالية وأخلاق واطية .
أنظر شوف كثير من المتعلمين في البلد هم في وادي وما يحدث في البلد في وادي آخر .
شوف نجوم المجتمع والمشاهير.
شوف أئمة المساجد.
الدكاترة.
الصيادلة.
السياسيون.
الاعلاميون.
التجار.
خش الفيسبوك ما ح تعرف المتعلم من الما متعلم.
أمشي اليوتيوب ح تلقى مستوانا واحد.
شوف التك توك.
تويتر.
بتلقى كلو جاهل .
لا ظهر فينا تعليم ولا مسؤلية.
أمشي الأسواق شوف بعينك.
أمشي شوف أخلاقنا مفروشة في الأرض (6) بجنيهين و(9) هُوادة.
أسأل من الإغاثة الجات.
شوف سماسرة البيوت .
تجار الأزمات.
الناس العملت قروش من النازحين.
تعال الأحياء في الخرطوم شوف (أولاد الحلة) شغالين شنو؟
هل أنت حسيت بدور للمتعلمين في هذه الحرب؟
هل حسيت إنو البلد دي فيها كبير ممكن الناس ترجع ليهو؟
هل حسيت إنو قرايتنا ليها أثر؟
محنة الحرب دي كشفت عورات كثيرة وأهمها (جهل المتعلمين) و(قِلة حياء الجاهلين) .
نسأل الله السلامة والعافية.
#محمد_الطيب_الأمين