يضرب رأسو بالحيطة

قزاز ورذاذ
محمد الطيب الامين
يضرب رأسو بالحيطة ..

دون شك يعتبر (الحارس الأمين) أبو عشرين أفضل حارس مرمى في السودان حالياً.
لا يتفوق عليه محمد المصطفى إلا ب(فورمة المباربات والثقة المكتسبة من المشاركات المتصلة).
لكن عندو غلطات بتاعت (مبدتئين) .
أيوة صاح.
عندو أي.
وعندو برضو في تاريخو أهداف أخرجها لا يقدر عليها إلا أبو عشرين.
ولا ما شفتها؟
المكانة الوصلها دي وصلها عشان عندو أهداف أخرجها ما بخرجها إلا هو.
يغلط ويصلح غلطو وندعمو لما يعتزل.
نقول لأبو عشرين لو جاتك شتائم من الهلال فهي شتائم عاطفية متحركة وليس ثابتة. (الفليم بتاع الشتائم البدأ معاك أمس ده) شغال مع بوغبا تلاتة السنين.
في النهاية لما بوغبا صعد بالهلال للمرحلة القادمة قالوا (ماشاء الله تبارك بوغبا وصل مرحلة النضج).
وهو لا وصل مرحلة النضج ولا حاجة.
قالوا كده عشان كان سبب في تأهل الهلال.
وبكرة أنت لو طلعت ليك ركلة جزاء وكنت سبب في تأهل المنتخب أو الهلال ح يقولوا (وصلت مرحلة النضج).
ولو الشتائم جاتك من (الأشاوس) الأحباب المريخاب فهي (تصفية حسابات) سببها لون الدم .
نحن لما قلعناك من المريخ خلينا مرمى (الإصيفر) عريان زي نجيلتو اليابسة.
قال حميدتي جاب لينا نجيلة قال.
ونحن نعرف كيف إنها كانت نجيلة؟؟
المهم.
ما تشغل بالك ، المنتخب منتظرك وكذلك الهلال.
نثق فيك وفي إمكانياتك حارس كبير وأمين.
تغلط مرة وأتنين عادي ده حال الكورة.
المهم إنك تواصل المسير وربنا يوفقك إن شاء الله.
ودعوتنا للناس العندهم رأي إيجابي دائماً خلوا صوتكم أعلى وما تخلي زول يصادر رأيك ، قول رأيك والما عجبو خلي يضرب رأسو بعمود الكهرباء القاطعة.
كل التوفيق ليك ولبوغبا وكل المجموعة
و…
ولون الدم لأى كركدي.