قزاز ورذاذ محمد الطيب الأمين
إتبلت الخدود وثبت الوجع إن شاء الله..
رمضان في السودان تفاصيل شهر مختلف بإختلاف السودان والناس.
نحن شعب بنصوم رمضان على طريقتنا الخاصة.
بنصوم في شمس لا يعلم بيها إلا الله.
بنصوم في ظروف إقتصادية صعبة.
اليوم طويل.
والكهرباء يوم بعد يوم.
والحنفية تشخر.
بنجيب السُكر باليوم وصايمين على الله.
رمضان بجي بخيرو.
ناس في (السِقالة) شغالة في عز النهار وناس في المنطقة الصناعية والسوق والباعة المتجولين.
البطيخ على السكين ورش الحوش و(الرقاد) في مكيف الجامع.
التلاوة والمُسواك والتلج.
وشهوة الصائم لما يمشي السوق الساعة 3 ويكون عايز يشتري اي حاجة.
باسطة وجرجير وشمام وليمون ونعناع وبيبسي وطعمية حارة.
السِبحة والأخلاق الطيبة.
أنا فاطر بره و(تحليل) الصيام.
العشاء البخليك تصبح عطشان.
السحور الفاتك.
والغلاط في (الشهر البيكون كبير من تاني يوم).
يقول ليك صيامنا غلط.
كل سنة صيامنا غلط.
الما صام رمضان في السودان ما صام.
فعلاً رمضان احلى في السودان.
والله العظيم فطور الناس في الشارع ده براهو أمن وأمان وإطمئنان.
في بلدي ما في زول بفوتو الفطور.
والله كل البيوت بيوتنا وكل الشوارع حقتنا.
تفطر وتشرب شاي وقهوة في أي شارع.
صوت الخلاطة قبل ربع ساعة طالع من أي بيت.
البرتقال.
التبلدي.
الكبكبي.
العدسية.
الحلو مر
السلطة .
رمضان يأتي والبلد تعيش حالة دمار وخراب ودموع وموت.
لا الشوارع حافلة بالناس ولا المساجد مزدحمة.
نعم ستبتل العروق بعد أن إبتلت الخدود بالدموع والأرض بالدم وسنرفع شكوانا لله سبحان وتعالي فنحن خصوم كل من كان له سهم في هذه الحرب وعند الله نجتمع.
#محمد_الطيب_الأمين
Share this content:
