قزاز ورذاذ
محمد الطيب الامين
لو جارت عليك ايام تعال عندنا حلو مر محل نودي ما عارفين ؟
عندما يكون الإسكيرت (أرجل) من العِباية .
في بلدي لو علموا (تاريخ القيامة) لزادوا سعر (المُصلاية).
كسرة :
قبل الحرب قالت لي : أنا في رمضان بلبس عبايات بس.
ولما قابلتها صدفة رابع يوم في رمضان لقيت العباية (مُفصلة ومُقسمة) فقلت لها متسائلاً : وبعد رمضان بتلبسي شنو !!!؟؟؟
مرات (الاسكيرت) بيكون أرجل من العباية.
كسرة ونص :
فشلت حتى الآن في متابعة ولو حلقة واحدة من أي مسلسل سوداني.
صراحة لا أعرف العيب فينا ولا في المسلسلات ولا خلاص كِبرنا وكبرت أحزانا؟
كسرة ونص وخمسة:
عندنا نحن في السودان ثقافة الونسة بالأكل.
يقول ليك : فطرنا بدمعة فراخ واتعشينا بي كفتة واتسحرنا بي كنافة.
الاكلتو أنت لو ونستنا بيهو ما ح نشبع ولذلك حتى لا تكون (أهبل) ما تونسنا بالحاجات الفي بطنك.
كسرتين :
قبل رمضان قالت لي أنا بالنهار بقفل تلفوني ، وبعد الفطور لا بجر يد ولا بجر رجل وبعد التراويح بنوم وما بصحى إلا للعشاء.
الغريب في الأمر تلفونها مشغوووول في كل هذه الأوقات التي ذكرتها.
مسكينة شكلها خاتاني للعيد.
و…..
ويا أستاذة : مفروض بعد تغسلي عِدتكم تغسلي عِدة الجيران كمان.
و……
ولو جارت عليك أيام تعال ….. عندنا حلو مر محل نوديهو ما عارفين.
Share this content:
