(قال ليك)..

ضفاري
عبد اللطيف ضفاري

(قال ليك)..
المنتخب السنغالي بعد مباراتو مع منتخبنا الوطني مباشرة اتقدم بي شكوى للاتحاد الدولي لكرة القدم، قال الحركة بتاعت عبدالرؤوف دي (حركة مسلحة)؛ وطالب بالتلاتة نقاط، اها لحسن حظ المنتخب السنغالي قالوا لجنة الانضباط في الفيفا كانت مجتمعة بخصوص شكوى اتقدم بيها سوداكال قال النمير ما هناه بعيد الام، فقالوا يبتو في شكوى المنتخب السنغالي اول لانو مشاكل المريخ بقت محتاجة قاضي شرعي، فالمهم شالوا الشكوى بتاعت المنتخب السنغالي المرفق معاها فيديو الحركة بتاعت عبدالرؤوف، وقاموا شغلوها عشان كل واحد من اعضاء اللجنة يقول رأيو، اها اول واحد قال ليهم يا اخوانا دي ما حركة مسلحة ولا حاجة، الزول دا وجدي صالح ودا شغل بتاع ازالة تمكين المنتخب السنغالي من المجموعة، نط واحد تاني قال ليهو وجدي رُقاد الحراسات ما خلي ليهو ضهر يلعب بيهو (ليدو)؛ خلي كورة، وقام قال ليهم انا كنت عاوز اقول دا خالد سلك لكن ما شايفو (سافي)؛ عشان كدا برجح يكون دا ود الفكي، قام واحد تاني من اعضاء اللجنة قال ليه اذا كان وجدي رقاد الحراسات ما خلي ليه ضهر يلعبو ليدو، كمان ود الفكي السجائر البرنجي ما خلي ليهو صدر ينزل بيهو واحد وخمسين في حريق كوتشينة خلي ينزل بيهو كورة زي دي، وقام عاين لي واحد من اعضاء اللجنة قال ليه مالك ساكت كدا، وقاعد زي البلابسة لا (بتستنفر) ولا بتجيب الحجار، ادينا رأيك، قال ليهم انا بفتكر انو الزول دا هو حمدوك، شغل سمح زي دا ما بعملو الا حمدوك عاوز يرفع اسم السنغال من قائمة الدول الراعية للالقاب، وكمان دقس بدل ما يكمل ويشوت في القون هو خلاها لي مناوي، قام واحد قاطعو قال ليه انت قاصد بي مناوي اللابس نمرة خمسة دا؟! قال ليهو ايوا، قال ليه دا ما مناوي لكن دا المصباح بتاع البراء ابن مالك، رئيس اللجنة قال ليه عرفتو كيف؟! قال ليه من لفة يدو، رئيس اللجنة قال ليه الحاجة الانا عارفها انو بتاع البراء بطل اللف وبقي يركب فراشة، فانا بفتكر انو دا مناوي، المهم قعدو يتغالطو، رئيس اللجنة يقول ليه دا مناوي، والعضو يقول ليه دا المصباع، اها في غلاطهم دا جاهم داخل واحد متخصص في الشأن السوداني شغلو ليه الفيديو وقامو سالوه الشات الكورة دا مناوي وللا المصباح؟! قال ليهم دا لا مناوي ولا المصباح؟! قالوا ليهو دا منو طيب؟!.. قال ليهم من الطريقة الغبية والمشاترة اللعب بيها الزول دا الكورة دي، فدا التوم هجو..!!
و..
رمضان عجب نافس رمضان الشهر في الجمال، اداء كبير من لاعب كبير قيمة وقامة💪!!
و..
محمد المصطفى في بداية المباراة كاد ان يجبر الحبيب محمد عبدالماجد للكتابة عن عثمان حسين، والذكرى السنوية لرحيل حميد😂!!
و..
المنتخب السنغالي لولا الاخضر الكامل لظننت انه الجمارك الموريتاني..🙄!!
و..
والي الدين خضر يبذل مجهودا كبيرا ليكون (بوغبا) الثاني؛ مع انه لو بذل ربع ذلك المجهود سيكون والي الدين الاول والاجمل👌!!
و..
ارنق ورفاقه بكوا قبل انطلاق المباراة عند ترديد نحن جند الله جند الوطن، فكانوا بني السودان الذين حملوا العبء وكانوا قدر المسؤولية✌️!!
و..
عبدالرؤوف لا تستطيع الحروف وصف جمال ادائه فقد كان امام السنغال (سمع وشوف)🤍!!
و..
بخيت لم يكن خميس فقط، بل سبت واحد و(اثنين) وثلاثاء واربعاء، وجمعة بفطورها😍!!
و..
ابوعاقلة كما هو قرش المنتخب الابيض لكل ايامه السوداء💙!!
و..
الفرص التي اهدرها ابوبكر عيسى وهو في مواجهة المرمى كفيلة بان تجعل مانشيت صحيفة حبيب البلد السنغالية (دا ما السنغال.. دا فاطمة صادق الكاردينال)😏!!
و..
صلاح عادل.. طالع نازل انت عاقل مافي لزوم تشاغل🌹!!
و..
لأول مرة منذ زمن بعيد نرى بأعيننا ان سودانا فوق، شكرا لاعبي المنتخب فقد اوقفتم زمن الحرب شوية واهديتمونا (لحظات هنية)🤍💙!!