قزاز ورذاذ
محمد الطيب الأمين
من ذكريات الجمعة .
زمان في حلتنا كلنا كنا شايلين تلفونات (ربيكا) .
وأي واحد فينا تلفونو فيهو عيب معين.
أنا تلفوني عيبو إنو (الزر) بتاع الرقم (3) ما شغال.
يعني ما بقدر أضغط الرقم (3).
مرات (بعضي) الحتة الفيها الرقم (تلاتة) دي.
بعضيها عديل عشان الرقم يتكتب وأقدر أتصل.
في النهاية الرقم (8) لحق لي الرقم (3) .
طوالي شلت التلفون وضربت بيهو الأرض.
وعندنا واحد عيب تلفونو بفصل أول ما يرفعو تجاه (أضانو).
حكمة الله تلفونو دا يكون شغال فل الفل أو ما تجيهو مكالمة ويرفع التلفون طوالي بطفي.
مرة قدمت ليهو نصيحة لكن زعل مني.
قلت ليهو يا فلان أنت عارف الحل الوحيد عشان تلفونك دا يشتغل تعمل شنو ؟
قال أبدل التلفون صاح ؟
قلت ليهو : لا ، بدل أضانك أحسن .
زعل مني زعل شديد والله.
المهم..
كان في بت في حلتنا جميلة جمال ما عادي.
جميلة ومثقفة مع إنها صغيرة في السن.
وظرفهم الإقتصادي في البيت تعبان شديد.
مسكينة.
وجنها ضحك.
كانت شايلة ليها تلفون (ربيكا) مربوط بي لستك قروش من النص.
تلفونها دا يا كافي البلا زي (القرد) مربوط من (النص) اليوم كلو .
وهي خجلانة من الحكاية دي خجل شديد.
تخجل من شكل هاتفها مع إنو (شكلها هي) تخجل منه القمرة ذاتا.
وبعدين صوتها جميييل في التلفون.
بس مشكلتها ما بترد.
ما بترد إلا تكون قاعدة في البيت.
خجلانة من اللستك.
عندنا صديقنا إتوكل وجاب ليها تلفون جديد لنج هدية .
قال عشان يخليها ترد على المكالمات بدون خجل وفي أي وقت.
البت شالت التلفون الجديد باعتو في نفس اليوم وجابت ليها لستك قروش أضافي للتلفون القديم.
صاحبنا دا بعد كم يوم قابلني قال لي هسه زي دي يعملوا ليهو شنو عليك الله؟
قلت ليهو انت ذاتك غلطان.
قال لي كيف؟
قلت ليهو : زي دي تجيب ليها هدية (لساتك قروش) ما تجيب ليها تلفون.
المهم .. لقى البت سألها قال ليها ليه ما شغلتي التلفون الجديد؟ وليه لسه شغالة بالتلفون دا ؟
قالت ليهو : تلفون دا ما بغيرو نهائي نهائي.
قال ليها : ليه العاجبك فيهو شنو ؟
قالت ليهو : الراديو بتاعو نضيف.
راديو قلتي لي؟
خلاص يا ليلى المغربي خليك مع الرادي دا.
جمعة سعيدة عليكم يارب ، وأبقوا عشرة على (الرادي) وعلى الموجة المتوسطة 🌹♥️
#محمد_الطيب_الأمين
شارك الخبر على:
