الما شافو ضاع والشافو إتلخم ..

قزاز ورذاذ

بقلم || محمد الطيب الامين

الما شافو ضاع والشافو إتلخم ..

الهلال بعد التسجيلات دي بقى زي (قميص المرقة).
حاجة كدا ما ممكن تقعد بيها في (البيت) ولا ممكن تحوم بيها في الحلة.
أرقى من كدا .
ما في زول بلبس (بدلة) ويقعد بيها في البيت .
ولا في زول عندو (هلال) زي دا بلعب بيهو (دافوري) يا معتصم جعفر .
نحن تاني ما بنلعب إلا مع القدرنا .
وفي السودان ما في فريق قدرنا يا أسامة عطا المنان .
ما في .
وفريقنا دا ما فريق بقعدوا بيهو في البيت .
الهلال دا تاني نخليهو للمناسبات الرسمية بس.
تنتهي المناسبة نشيلو نرفعو في الدولاب فوق.
عزيز وغالي.
عشان كدا السنة دي ما بنلعب بالعصر.
قررنا كدا.
ما ح نلعب بالعصر.
دا ما فريق بلبعوا بيهو العصر.
دا فريق بتاع أمسيات.
وفي الأمسيات بنختار (المساء النسيمو هابي) .
واصلاً نحن من يوم أدينا المريخ أربعة يفترض تاني ما نلعب عصر.
ولا نلعب في نجيلة مغبشة.
نجيلة لو ما بقت رويانة ما بنلعب فيها.
بنقدم إحتجاج.
تاني كل زول يمد كدارتو قدر نجيلتو .
فريق أقل لاعب فيهو (عالم).
كلهم علماء ماشاء الله تبارك الله .
العلماء ديل لا بشبهوا الدوري السوداني ولا بشبهوا نجيلة حبيبي مفلس الفي ملاعبنا دي.
في الدوري السوداني ح نلعب بفريق الشباب.
وفريق الهلال الأول دا ح يكون للمناسبات الرسمية.
من العيد للعيد.
شغل فاخر.
مجلس الإدارة كريم وجمهور الهلال بيستاهل.
مجلس كريم ولاقى ليهو ناس بيستاهلوا.
نشكر الله أن جعل الهلال بدون علة.
ونشكر رئيس النادي السوباط ونشكر مهندس الحب العليقي.
بنشكرهم إنهم عملوا هلال زي الدواء .
في التلاتة سنين بتاعت الحرب دي الهلال كان علاج لناس كتار .
ودا جهد عظيم من رجال أوفياء بذلوا المال في زمن البخل والنزوح .
الهلال عافيتنا .
وعزنا .
وفخرنا .
هلال السنة دي (الما شافو ضاع والشافو إتلخم) 💙💙
#محمد_الطيب_الأمين