وهل دا بستاهل مخدرات يا عشة ؟؟

قزاز ورذاذ
محمد الطيب الأمين
وهل دا بستاهل مخدرات يا عشة ؟؟

(أسلاك الكهرباء) في السودان بقت (تقعد) بدون (تيار) أكتر من قعادها ب(تيار) .
الكهرباء لما تجي في (أسلاك) قاعدة تتخلع .
(سلك الكهرباء) و(حبل الغسيل) الأتنين بدون (تيار).
حليل زمن الكهرباء كانت لو (ضربت) زول في البيت نحن أسبوعين ما بنسلم عليهو .
كسرة :
إستعجال إفتتاح مطار الخرطوم ليس من المصلحة.
قبل الحرب مطار الخرطوم أشبه بالميناء البري .
فهل سيعود المطار بعد الحرب (مطار زي الناس) ولا برضو ح يكون ميناء بري ساكت ؟؟
كسرة ونص :
المشكلة ما في أنو عشة الجبل قبضوها بمخدرات ولا ما قبضوها.
دي ما المشكلة .
المشكلة هل أغنيات عشة الجبلية دي دايرة ليهو (بنقو) ؟
كسرة ونص وخمسة :
في الفاشر الصابرة رجعن الأمهات لعهد الصحابة .
الأم طفلها يبكي وهي (شادة حجار جوة الحلة) وتقول ليهو : (ما تبكي الملاح قرب ينجض).
نجض القلب ولم تنجض الحلة .
كسرتين إلا ربع :
لا أعرف كيف فلتت سلمى سيد من الهلال وأصبحت مريخابية ؟
يا سلمى إنت زي النيل الجاري دا يفترض تكوني هلالية وبالعدم تكوني هلالية برضو .
كسرتين :
من ذكرياتنا اللطيفة : كان لنا صديق قديم عندو محل باسطة .
الزول ده ما بشيل من البنات قروش نهائي .
تجهيو واحدة (تكتل ليهو عيونها) طوالي بيلف ليها (ربع كيلو سفري) .
تجي واحدة تقول ليهو : حبيبي مساء النور ، بيلف ليها (نص كيلو طوالي) .
يشيلن الباسطة ويضحكن فيهو وفي عوارتو.
يأكلن باسطتو ويعرسن غيرو.
الواحدة لو عرفت ليها بتاع باسطة جديد تاني صاحبنا ده سلام الله ما بتديهو.
مرة في واحدة كانت كل يوم بعد المغرب بتجي تشيل من صاحبنا ده (كيلو إلا ربع) مجانا وبتمشي .
أنا ما عارف ليه بتشيل كيلو إلا ربع تحديداً ؟
حيرتنا ذاتو .
يومياً تأكل في الباسطة أ تقول بتلعب في الموردة .
المهم ..
بعد فترة الزولة دي اتعرفت على صاحب محل تاني .
يوم من الأيام قابلت صاحبنا المسكين ده وعملت فيها ما بتعرفو.
سلم عليها أبت ترد .
قال ليها : يا فلانة خلاص نسيتي لما كنت بلف ليك كيلو إلا ربع في جريدة (الرأي العام) ؟
عاد ده كلام ده؟
هسه جريدة الرأي العام سألتك؟
و…
ويا أستاذة : من نحافتك دي شكلك كانوا بلفوا ليك الباسطة في جريدة الدار .
و.. و..
والكنت قايلو فات زمان رجعتو بي ………. (قطعتين بسبوسة) .
#محمد_الطيب_الأمين