قزاز ورذاذ
محمد الطيب الامين
وجيت أقول مبرووك عليك (10) ..
أواصل في الحلقة العاشرة من قصة صديقي في ليلة زفاف حبيبته .
بعد ليلة المدينة الجامعية (المليانة باعوض) ، قلت ليهو نمشي نلحق الشاي في البيت.
قال : لا جاييني زول.
جاييك لشنو ؟
قال لي : لما يجي ح تعرف.
ساعة كدا والزول جا.
زول نضيف وشايل ليهو شنطة يد والعطر يلخم ومفتاح العربية ونظارات ولابس لبس راقي ومهندم.
بالمناسبة.
حسن الزبير في أغنية (ليه حياتنا إخترت غيرها) التي غناها الطيب مدثر ، سأل (تلاتة أسئلة) ممكن تكون من أخطر الأسئلة التي وردت في سفر الأغنية العاطفية السودانية.
الأسئلة الوردت في الأغنية بتقول :
هل صحيح راقي ومهندم ؟
هل ببكي الريد عيونو ؟
هل عرفتو ما بتندم ؟
في الليالي القاسي طولا.
لما (حبيبتك) تختار فارس أحلام غيرك ، طوالي أنت بجيك فضول تعرف ليه إختارت داك وخلتك أنت ؟
الحاجة دي بتولد جواك أحاسيس صعبة جداً.
عشان كدا حسن الزبير في الأغنية دي قال :
هل صحيح راقي ومهندم ؟
السؤال دا فيهو كمية بتاعت براءة ما طبيعية والله.
قال ليها : حبيبك الجديد إخترتيهو وخليتيني ليه ؟
هل عشان هو راقي ومهندم ؟
يعني يا حسن الزبير أنت ما راقي ولا شنو ؟
قال ليها : هل صحيح راقي ومهندم ؟
اهاا أفرض إنو راقي ومهندم ح تعمل شنو يعني؟
الرحمة والمغفرة للشاعر الغنائي الكبير حسن الزبير.
المهم.
الزول الراجيهو صاحبي جا.
وزي ما قلنا : زول نضيف وراقي ومهندم وشايل شنطة.
فتح الشنطة أدى صاحبي ورق كمية كدا.
وقال ليهو يوم الثلاثاء جهز القروش.
قلت ليهو دا ورق شنو؟
قال لي : تقديم.
تقديم شنو؟
قال لي الزول دا أنت ما عرفتو؟
قلت ليهو : ابداً والله.
قال لي دا (فلان الفلاني) بطلع تأشيرات لأوروبا وتعصر ليهو حاجة.
يا زول دا كلام شنو؟
قال لي والله.
وبي كم الكلام دا؟
أديتو إحساس إنو الموضوع عجبني وكدا.
قلت ليهو بي كم؟
قال لي : بتمشي ؟
قلت ليهو : طبعاً بمشي.
قال لي : كنت عايز اكلمك لكن عرفتك ح تشبكني البلد والناس والأهل.
قلت ليهو : الشغلانية دي بي كم؟
قال لي : بشيل منك 2500 يورو وبعد تصل هناك تسلمو 1500 يورو.
يعني كلها 4 ألف يورو .
والزمن داك أنا علي بالقسم اليورو في التلفزيون ما شفتو.
قلت ليهو : يعني أسلمو كاش 2500 يورو ويجيب لي تأشيرة ؟
قال لي أي.
قلت ليهو ولو ما جابها ؟
قال لي برجع ليك القروش.
ولو ما رجعها لي ؟
قال لي برجعها زول معروف.
قلت ليهو كدا أفرض ما رجعها ؟
قال لي تشتكي بس.
أشتكي ؟ والدليل شنو اني سلمتو يورو ؟
هل بديك إيصال ؟
مستند ؟
ختم ؟
توقيع ؟
لا.
قلت ليهو : كدا خلي دا كلو ، أنت لقيت اليورو وين ؟
قال لي فلان قال برسل لي .. (فلان دا أنا بعرفو فعلاً).
طيب .. الورق دا شنو ؟
قال لي : تجاوب على الأسئلة دي وح يدوك مواعيد في السفارة الفرنسية بتشيل الورق دا وبعملو ليك معاينة وبعد داك ما في حاجة إلا السفر.
لما قال لي (وبعد داك ما في حاجة إلا السفر) حسسني إنو مسافر الكاملين.
قلت ليهو أقول ليك حاجة ولا بتزعل ؟
قال لي قول.
قلت ليهو أنت ما عندك موضوع والله.
ليه؟
قلت ليهو : هسه أنا نصيح كدا بدفع لي لزول 2500 يورو ، زول لا عندو مكتب ولا عارف بيتو وين ولا عارف حبوبتو.
زول كل العارفو عنو إنو شايل شنطة ولابس ليهو نظارات عاملة زي طفاية السجائر ولابس ليهو خاتمين فِضة ؟
يا زول أنت جنيت ولا شنو ؟
على بالقسم المرة دي أنا أكلم (أمك) و(عمك) و(وشي دا تاني ما تشوفو).
قال لي : بالمناسبة موضوع أوروبا دا أنا بديتو قبل عرس الزولة دي.
قلت ليهو كضاااااب قبل العرس أنت اليورو دا (قروش) ولا (شكولاتة) ما كنت عارفو ذاتو.
بعدين لما أنت بديت موضوع السفر أنا كنت وين يا كذاب ؟
المهم .. الكلام أكل معاهو جمبة شديد.
وحسيت بيهو داير يقول لي أمشي لا بيني لا بينك.
قلت ليهو : هسه رسل لفلان دا رسالة قول ليهو موضوع أوروبا طرشق وما ترسل القروش.
وأنا والله المرة دي بكلم ناس بيتكم.
وهسه لو ما داير تمشي معاي الحلة أنت حر.
قال لي : أنت أوروبا دي مالك بتتعامل معاها زي الحاجة الكعبة وخايف منها كدا ؟
قلت ليهو : شوف يا الحبيب أنا ما عندي مشكلة في أوروبا ولا الصين.
لكن داير تمشي ما تمشي بالدس.
أمشي كلم أمك وشيل منها العفو وأنت حر بعد داك.
المهم .. سكت مسافة كدا وقال لي أرح نمشي.
لما لقيت رأسو بدأ يجي قلت الليلة بردمو كدا لما نصل البيت.
أول ما طلعنا قلت ليهو : داير تخلي السودان عشان بت ؟
قال لي : محمد أنت قلت رأيك وإنتهينا ولحدي هنا كويسين.
قلت ليهو بمعنى شنو يعني كلامك دا؟
قال لي : سفري دا حاجة ما بتخصك.
يا زووول ؟
كيف الكلام دا؟
حاجة ما بتخصني عديل كدا؟
قال لي ااي ما بتخصك.
بيني وبين نفسي قلت ما أرد .. نصل البيت وبعد داك يتفاهمو معاهو ناس بيتهم.
تاني ما إتكلمنا مع بعض لما وصلنا.
لما وصلنا والله والله والله دموع أمو وأختو تكسر القلب.
أختو متعلقة في رقبتو أكتر من ربع ساعة.
قربت تقع بيهو في الأرض.
وفرحااااانة فرح، في الأطفال أنا ما شفت فرح زي دا.
نست ذاتو إنو أخوها عيان أو مجروح.
وهو كان جسمو تعبان شديد وحيلو ميت وصوتو ما ياهو.
وعيونو واقعة وحالتو بطالة.
نزلتو وطلعت طوالي.
الكلام دا يوم الأحد .
يعني اليوم العاشر أو الحداشر بعد المناسبة .
المهم .. بالليل زي الساعة 8 أختو دقت لي تلفون قالت لي عايزين نوديهو المركز عندو هبوط .
قلت ليها وافق يمشي ولا أنا أمشي أجيب درب وأجيب الممرضة في البيت ؟
قالت وافق يمشي .
على ما بال أصلهم الزولة دي اتصلت زي عشرة مرات.
ومرسلة رسالة مكتوب فيها (محمد عليك الله إستعجل).
وصلت لقيتو فعلاً تعبان وجسمو هابط لدرجة بعيدة شديد .
شلناهو ومشينا .
أدوهو درب والدكتور قال ما نطلع نخليهو لحدي الصباح .
زي الساعة 2 بالليل تاني أدوهو درب .
الصباح طلعنا .
وطلع ماشي برجلينو عادي .
أنا حسب تقييمي ما حسيت إنو صاحبي دا إتحسن أو ماشي في طريق التعافي .
كل يوم بشوف إنو حالتو ماشة تتأخر .
حتى على مستوى التصرفات كان ما أوكي .
المهم.
قلت لأختو بعد المغرب بجيك نطلع مشوار ، قالت لي تمام .
بعد المغرب جيتهم وما دخلت البيت.
عملت ليها جرس طلعت وطلعنا.
قلت ليها ح نمشي بت ناس (فلانة) .
فلانة دي البت الجميلة الكان جابت لينا الخبيز تاني يوم للعرس لما مشينا نبارك لأم عروس .
جميلة لكن عندها حركات هبلة جداً وهي من الشخصيات البتوترني جداً لما أشوفها .
قلت ليها أدخلي سلمي عليهم عادي وإتونسي عادي وحاولي في نص الونسة أعرف العرسان جايين ولا ما جايين ولا شنو بالضبط؟
قالت لي : ليه ؟ ح نستفيد شنو ؟
قلت ليها : إنت أمشي بس وأعملي زي ما قلت ليك .
وأنا ح أرجع بيتنا لما تكوني طالعة أديني جرس بقيف ليك في الشارع التاني عشان لو فلانة دي طلعت تقدمك ما تحس بي حاجة .
المهم .. بعد نص ساعة كدا عملت لي مسكول .
مشيت عليها .
اهاا قالوا شنو ؟
قالت لي : هي ذاتا قالت ما عارفة العرسان جايين متين .
كيف ما عارفة ؟
قالت ليك شنو لما سألتيها؟
قالت إنو ما حددو يوم لكن تقريباً تلاتة أسابيع .
المهم .
رجعنا .
واليوم إنتهى على كدا .
يوم الأتنين تاني زي الساعة تمانية صباحاً تعب .
ومشينا المستوصف لقيناهو قافل بفتح تسعة .
وتعب لينا في العربية أكتر .
مشينا الصيدلية أدوهو الدرب جوة العربية .
المهم .. أمو بعد رجعنا والله من الهم والحزن وشها بقى أسود من الفحم.
قالت لي : صاحبك دا لو برضى ليك أنا ببيع (الدهيبات العندي ديل وخليهو يمشي عمرة).
قالت لي : لو وافق بكرة بمشي الصايغ وبجيب ليكم القروش .
ح أقيف هنا ونواصل بكرة إن شاءالله في الحلقة رقم حداشر .
و……
وجيت أهنيك وأصافحك وجيت أقول مبروووك عليك 💔💔
#محمد_الطيب_الأمين
Share this content:
