و(التلج الحار) ..

قزاز ورذاذ

بقلم ||
محمد الطيب الأمين

و(التلج الحار) ..

الراجل دا (خواجي) من دولة رومانيا.
إسمو ريجكامب وصل مدينة بورتسودان قبل أسبوع عشان يوقع عقد مع نادي الهلال (مدرب).
وقع العقد وفي خمسة أيام بقى (سوداني شديد) .
وقع عقد مع الهلال لكن السودان (وقع) ليهو في قلبو .
ضرب السمك والقهوة والسِلات.
ضربتو الشمس والرطوبة وجرب (التلج السخن) و(الشطة الباردة).
خشا في الجلابية والعراقي والطاقية.
وأظن وليس كل الظن إثم (أكل النعيمية) و(لقمتين تلاتة من أم فتفت).
وسمع حيدر بورتسودان بغني :
القسوة في ظلم الأحبة
يا قاسي بتجرح جفون
هذه التفاصيل الصغيرة التى تركها الهلال في هذا (الخواجي) تحمل رسايل كبيرة وكتيرة.
بلدنا المجروحة ما زالت قادرة على التأثير والجذب.
الهلال زي عطر الريحان (لو هبشتو بتتعطر ، ولو هبشك بتتعطر ، ولو جيت ماري جمبو برضو بتتعطر).
زحمة عطور .
هوا وهوى .
الهلال هو بوابة الدخول للحياة الإجتماعية السودانية.
يمثل حياتنا وثقافتنا وتاريخنا وتراثنا .
الهلال (إبن بار) لهذا الوطن ولذلك دائماً يكمل صور الإنتماء وعمق الرباط.
الحصل للخواجي دا إسمو (الحب من تاني يوم).
الهلال وطن ، والوطن هلال 💙💙
#محمد_الطيب_الأمين