خجلانة وعرقانة ..

قزاز ورذاذ
محمد الطيب الامين
خجلانة وعرقانة ..

صحيح (العرديب) كان بي واحد جنيه.
لكن ما مُركز والله.
ومع ذلك كنا بنشربوا عشان هو بي واحد جنيه.
تشرب وأنت واقف ، وتمشي وأنت مبسوط.
ومرات تشرب وأنت مبسوط ، وتمشي وأنت واقف.
والزمن داك (حميدتي البليد) كان بخاف من (التلج).
والله صحي.
زول أشعل الحرب وأول حاجة عملها في الحرب سرق (تلاجات المواطنيين).
عشان تعرفو غبي كيف.
العالم ذاتو إستغرب في حكاية سرقة التلاجات دي.
المهم ..
عندنا صديقنا متفلسف جداً.
متفلسف وبتاع حركات.
مرة جيت معاهو السوق العربي قلت ليهو تعال نشرب عصير هنا.
قال لي مستحيل أنا أشرب عند الجماعة ديل.
قلت ليهو خير يا ود النفيدي ما في مشكلة.
المهم..
يوم من الأيام وبالصدفة قبضتو ومعاهو (بت) نص النهار (عرقان) وواقف قدام (الحافظة) وحالتو تحنن.
هو بشرب في (شعير) وحبيبتو بتشرب في (عرديب).
والبت خجلانة ومغطية نص وشها بالطرحة.
قلت ليهو غريبة .. المفروض أنت تشرب العرديب والبت دي تشرب الشعير.
قال لي : تشرب شنو يا محمد ؟
قلت ليهو : خلي يدني مُشكل وأرح نقيف في الضل داك.
كلمة أرح نقيف في الضل زعلتو شديد لكن أكلها في حنانو.
و(البت) خجلانة خجل يحير.
قلت ليها : يا أخت مالك مغطية وشك ؟ العصير دا حرام ولا شنو؟
قالت لي : لالا الشمس بس.
في سري قلت ليها : هو زول بشرب عرديب الساعة (أتنين وربع) الشمس بتعمل ليهو شنو كمان؟
صاحبي يتكبكب من الإحراج.
وأنا أصلاً زعلان منو من يوم قال لي (مستحيل أنا أشرب من الجماعة ديل).
قلت ليهو : ما قلت ما بتشرب من عصير الشمس!
قال لي : تعرف يا محمد أنا بتاع العصير دا بالذات بجيهو لشنو ؟
قلت ليهو : عشان عصيرو مُركز ؟
قال لي : لالا.
طيب عشان بي واحد جنيه ؟
قال لي : لالا.
طيب عشان شنو ؟
قال لي : والله عشان بلقاهو مشغل سمية حسن.
قلت ليهو : أول حاجة بطل كذب الشغالة دي سميرة دنيا ما سمية حسن ؟
دي ما المشكلة يا جماعة.
المشكلة بعد شربنا أنا جيت أحاسب بتاع العصير قال لي : لالا الجماعة ديل أمبارح عندهم (باقي معاي).
أتاري الشغلانية دي يومياً.
يا حليلك والله.
وتاني يا حليلك.
و……
وشكلك دا بادي الريد جديد تلعب معاي أنا يا حلو ؟
#محمد_الطيب_الأمين