المريخ برضو عندو كوليرا ..

قزاز ورذاذ
محمد الطيب الأمين
المريخ برضو عندو كوليرا ..

بالغ الإتحاد الموريتاني وهو يمنح المريخ جائزة الفريق صاحب (الأخلاق الأعلى) في الدروي الموريتاني.
مساكين ناس موريتانيا شكلهم ما سمعوا ببيعة سوق العتبة الشهيرة.
ما سمعوا بالمريخ في القاهرة لما تنازل عن القيم والأخلاق مقابل الأكل والشراب.
(بيعة سوق العتبة) التي إعترف بها وأعلنها نائب رئيس المريخ الجاكومي.
الإتحاد الموريتاني بحث عن أي مميزات للمريخ حتى يُكرمه شرفياً ولكن وللأسف لم يجد أي ميزة.
لا المريخ متصدر ولا وصيف ولا شيئاً مذكورا في موريتانيا.
بل المريخ في أيام مشاركته الأولى في الدوري الموريتاني إصطنع المشاكل وأطلق مجلس إدارته تصريحات سخيفة طالب فيها الإتحاد الموريتاني بسداد فواتير الأكل والشراب والسكن.
قوة عين عجيبة.
نازح وعينو قوية.
يسددوا ليك فواتير الأكل والشراب عشان أنت منو ؟
أنت منو ذاتك عشان تطلب كدا ؟
وضعك شنو في الدوري الموريتاني عشان يدفعوا ليك حق السكن؟
القال ليك أمشي موريتانيا منو ؟
هل هم قالوا ليك تعال؟
ولا طلعتك الحرب الأشعلها حميدتي ؟
حميدتي الذي قدم (نجيلة) هدية للمريخ بالحاويات قبل أيام قليلة من الحرب.
نجيلة ومعاها (ولد حفتر).
المهم.
جماهير الهلال الذكية أطلقت لقب (تهاني للمريخ).
ليه ؟
ليه تهاني ؟
لأنو المريخ في موريتانيا بشوف الفريق البغلب الهلال بقوم يقدم ليهو تهنئة.
والله صحي.
المريخ قدم تهنئة لبطل الدوري الموريتاني الذي هو وصيف الهلال.
معقولة يا تهاني (تهني) الوصيف وتنسي البطل الشرفي ؟
بالأمس واصل المريخ النزيف.
وإنضرب بالاربعة.
قوم على حيلك.
أربعة مع المدرب الجديد.
ودا المدرب رقم تلاتة في ظرف (8) شهور.
كلو (66) يوم المريخ بجيب مدرب جديد.
ومع ذلك هو يحتل المركز التاسع في الدوري الموريتاني عن جدارة.
فعلاً اخلاقهم عالية.
المدرب ميشو عمل معاهم سبعة تعادلات.
شالوا طوالي.
جاهم شوقي غريب لعب أربع مباريات عمل تعادلين وخسارة بالاربعة.
وكمان معاهو محسن سيد.
يا محسن أنت زول مدرب منتخبات أفضل تستقيل قبل الإقالة.
خليك من دا كلو.
قالوا المريخ ح يشارك في الدوري المصري.
ياتو درجة لكن ؟
الدوري المصري درجات.
والله فريقكم دا في دوري المؤسسات ما يشارك.
المريخ كان خصماً على الدوري الموريتاني.
وجاءت مشاركته فضيحة بكل المقاييس.
بل الشعب الموريتاني الشقيق مستغرب كيف المريخ وبهذا الشكل التعيس هو النادي الثاني في السودان؟
معقولة دا شكل فريق ترتيبوا رقم أتنين في خارطة الكرة السودانية ؟
حاجة تكسف والله.
المهم ..
الهلال يسعى الآن مجتهداً في سبيل تحقيق أول لقب أفريقي للأندية السودانية.
وبدأ هذا المشروع وسيتواصل.
من العيب أن لا يكون للسودان كأس خارجي بخلاف كأس الأمم الأفريقية سنة 70.
والباقي كلو كان ودي.
كانت كأسات ودية.
كأس بن ياس هو كأس ودي من أجل دعم النسيج العربي.
وكأس مانديلا كأس ودي من أجل دعم السلام والسلم الأفريقي.
وعليه .. جميع الأندية السودانية بدون كأسات خارجية.
ولذلك نرجو من المريخ العمل بقوة مع الهلال حتى نكسر الصفر الدولي الذي لازم القمة السودانية طوال تاريخها.
ولا ما كدا يا تهاني.
و…..
وجيت أهنيك وأصافحك وجيت أقول ….. مبروك عليك المركز التاسع.
و….
هو في كوليرا أكتر من كدا؟