(مخنوق العِشق ما بتنفعو أم دلدوم)

قزاز ورذاذ
محمد الطيب الامين
المثل بيقول : (مخنوق العِشق ما بتنفعو أم دلدوم) .

و(أم دلدوم) كما يعرف الجميع هى (ضربة قصاد فم المعدة من ناحية الضهر) .
هى ضربة في الضهر تساعد على (بلع اللقمة المعصلجة) .
لما تكون قاعد تأكل و(اللقمة تخنقك) بيقولوا (دقو في ضهرو).
تتلبع في ضهرك لما تعرف حاجة .
مرة كنت زعلان لي من واحد .
ومشينا الدكان نحن مجموعة .
ظبطنا (فتة) وقعدنا نأكل .
فجأة كدا الزول الأنا زعلان منو داك قام (خِنق).
خنقتو (اللقمة).
الجماعة قالوا لي (دقو في ضهرو).
قلت ليهم جداً .
قمت فوق قطعتو فيهو (بونية) مُحسنة ودبلت ليهو ولحقتو بي (شلوت) ضاغط لما وقع على وشو في الصحن.
وبقى يفرفر .
كنت عايز ألحقو بي (كف) على الطاير لكن الجماعة مسكوني .
قالوا لي : يا زول ما كدا .
قلت ليهم عشان تاني ما يخنق لينا .
هسه في زول نصيح بخنق شهر تسعة ؟
قالوا لي : بالغت ما كان تدقو كدا .
قلت ليهم أنا ضربتو كدا عشان (يِسلك) وما يخنق مستقبلاً .
المهم ..
نحن بعد الحرب دي كل واحد فينا عايز ليهو (أم دلدوم) كاربة جداً .
دايرين لينا (بُونية) عنيفة قصاد (فم المعدة) من ناحية الضهر .
بونية تنزل الدمعة العالقة وتنزل (كورة الشراب) القاعدة في قلب كل سوداني وسودانية .
عليكم الله دقونا دق شديد لأنو نحن محتاجين (أم دلدوم).
والله صحي .
جمعة سعيدة على الجميع ❤️🌹
#محمد_الطيب_الأمين