وهو ببرد الشاي بي كبايتين ..

قزاز ورذاذ
محمد الطيب الامين
وهو ببرد الشاي بي كبايتين ..

من لطائف (البكش وطق الحنك) ، عندنا صديقنا أيام المراهقة بتكلم مع (بت) بالليل قال ليها أنا عشانك يا سمر بمشي في الجُمر .
نظام البت حبيبتو وكدا .
ونظام الولد عنتر وكده .
قال بمشي في الجمر عشان سمر .
والبت صدقت وشغالة تتبسم .
قالت ليهو (تسلم لي من الجمر يا حبيبي).
قال ليها بمشي علي الجمر ، ولما الواطة أصبحت أمو جابت ليهو كباية الشاي ومعاها كباية فاضية . (كبايتين) عشان (يبرد الشاي) .
كباية فيها الشاي وكباية فاضية عشان يحول الشاي من الكباية دي للكباية ديك حتى يبريد الشاي .
ده حالتو قال بمشي علي الجمر .
وهو ببرد الشاي بي كبايتين .
ترى كم فتاة كانت تظن أننا بنمشي على الجمر ونحن في حقيقتنا بنبرد الشاي بي كبايتين ؟