أوع تكون بتسف تمباك ؟؟

قزاز ورذاذ
محمد الطيب الامين
أوع تكون بتسف تمباك ؟؟

(85%) من أبناء الشعب السوداني بيأكلوا عشان ما يموتوا.
و(15%) ماتوا عشان ما أكلوا.
بيننا والموت (وجبة).
كسرة :
تقول الأغنية : (أسير غزال فوق القويز كلام غزل معسول لذيذ).
(فنانة حلتنا القونة) غنت هذه الأغنية هكذا : (عصير غزال فوق الدويم).
أظن أن (عصير الغزال) هو الأخ غير الشقيق لشاي الغزالتين.
كسرة ونص :
النازحين في الولايات بالنهار من ضل شجرة لضل الحيطة ، يصارعون الذباب وينتظرون وردية البعوض ليلاً.
وبعض النازحين خارج السودان من (الكافي) إلى (البار) يصارعون الشهوات ويخسرون أمامها.
حاجة تكسف والله.
كسرة ونص وخمسة :
أكثر إمرأة محظوظة هي زوجة عمنا الشاعر الكبير عوض جبريل ، فقد كتب فيها أغنية (لو تعاين ليها تملأ ود عينك ولو تعاين ليك ربنا يعينك) ، ثم عزاها برائعته : (ما تهتمي للأيام ظروف بتعدي طبيعة الدنيا زي الموج تجيب وتودي).
نقول لعوض جبريل في مرقده : طبيعة الدنيا بقيت زي السيل (تشيل ما بتجيب).
كسرتين إلا ربع :
أسوأ (سبعة) حاجات في الدنيا دي (خمسة) هي : (مسمار الباب البشرط ليك القميص وانت في عجلة من أمرك) و(البت أم لقمة كبيرة) و(الكلب الما بتراجل وينبح فيك إلا بعد يشوف البنات في الشارع) .
كان عندنا كلب في الحلة والله ما بنبح فينا إلا لما يشوف الشارع فيهو بنات.
نظام عايز يحرجنا إبن الكلب .
كسرتين :
إيمان الشريف صوت فاخر وهي فنانة مُتألقة (شكلاً ومضمونا).
إيمان محتاجة أن تكسر (روتين الحماسة والسيرة) ببعض الأغنيات الكبيرة وأظن انها ستنجح في ذلك.
إيمان فنانة ملتزمة ومحتشمة وبت ناس.
كسرتين ونص :
كانت بتعاني من تساقط في (شعر الحاجب الشمال) .
جرتو بالقلم لكن (القلم ما ببقى شعر) .
نصحوها تقابل أخصائي .. قابلتو وقرر ليها (عملية زراعة) .
(زرعت) الحاجب لكن الشعر قام عكس . الشعر بدل ما يطلع بره محل الحاجب قام قام ليها لجوة محل المخ .
هي الآن عبارة عن (حاجب جوة) و(حاجب بره) .
تشوفها تحلف تقول عربية طافية نور .
كسرتين ونص وخمسة :
الجنجويد إقتحموا بيت الفنان الراحل محمد وردي في المعمورة وسرقوا حتى الشهادات التقديرية والصور والميداليات والوشاحات وحتى (العود).
سرقوا كل ذلك ولكنهم فشلوا في سرقة (القمر بوبا وبناديها وعصافير الخريف والطير المهاجر وكبرتي وليك 19 سنة).
وردي في القلوب والعقول.
و…
ويا أستاذة : شايفك لما تضحكي بتغطي خشمك .. اوع يكون مع الحرب دي بقيتي تسفي تمباك؟
و… و…
وما قلنا ليك الحب طريق قاسي وصعيب من أولو ما رضيت كلامنا وجيت براك أهو ………. (ديك كلبة والدة شد حيلك بس).