وشوشة الرياح
✍️ انور ابنعوف
*بيتروس للبيترو كرويات*
يعني اسي لو الهلال فاز بالابطال بتروس دا نعمل ليهو شنو
حقو نديهو حافز البطولة
ياخي مفروص نجرتقو عديل اسي لو ما بيتروس الهلال كان ينتظر موسم الهجرة الي المحال بيتروس ما انقذ الهلال بس دا فتح ليهو المجال لمغامرات الابطال الموسم دا مفروص يسمهو موسم بيتروس ويتسجل في الاراضي وفي السجل المدني باسمو اسي لو مابيتروس الهلال كان لقى ليهو ارض يقعد فيها الفندق القاعدين فيهو دا كان اتفرتق العليقي زاتو كان قنع وقال ماداير انتخابات غايتو الهلال السنة دي كان شال الابطال نسميه كاس بيتروس مانديلا احسن من بيتروس في شنو مانديلا مش كافح العنصرية بيتروس دا بتزحلقتو دا كافح الجراد الصحراوي والضنك والملاريا بيتروس دا ناس وزارة الصحة مفروص يشغلهو مفوض الشئون الانسانية وناس العون الانساني مفروص يبقوهو سفير عون انساني هو في عون انسان اكتر من التزحلقة دي ؟ اسي كدي اسرح معاي لو بيتروس دا ما اتزحلق كان بحصل شنو ؟ لكان جان انطلق ولاصنداي قعد كان كلنا شتتنا بعليقينا
اسي كان ما بيتروس اتزحلق الهلال كينيا دي ماكان شاف بيتروس خلانا في مواجهة الشرطة الكينية يعني الموضوع دخل علي وزارة الداخلية حقو نلغبو بجنابو بيتروس بيتروس دا في قيامة ارطغرال جنن ليك ارطغرل ولدو عثمان ياخي دا سحب ليك البساط من صنداي والجان بيتروس دا زي الزول الطالبك قروش وتفك ليهو الدرب ولمن لاقاك قال ليك عفيتك
اسي بيتروس دا طالب الناس كلها من العليقي لاصغر مشجع طالب الروماني زاتو لو مابتروس كان اسي في رومانيا يستمتع بالتحليل
عبر الفضائيات ولا سأل زول قال داير ديني
لو مابيتروس ياسر مزمل كان مشي الزمالة والغربال كان اعتزل
غايتو يا العليقي الزول دا لو ما اديتو 100 دولار عبد المهيمن للجان
تكون ظلمتو
ياخي دا فتح ليك نفاج الفرح وانعش الامال زي ماقال عثمان حسين
بيتروس لصناعة البيتروكرويات
تحـياتي …
شارك الخبر على:
